Logo DBNL
Werken. Deel 1: Gedichten (1875)

Werken. Deel 1: Gedichten

(1875)– Hadewijch–rechtenstatus Auteursrechtvrij

Vorige Volgende
tekstkritische noten

XXXVII.

 
Het sal de tijt ons naken sciere
 
Dat ons de somer sine baniere
 
Set op met bloemen meneghertieren
 
Dies werd verblijdt de meneghe fiere.
 
 
5
Want ons de daghen werden lanc
 
Ende die voglen hoghen haren zanc
 
Dien minne doet suete al sijn bedwanc
 
Hi mach hare segghen lieven danc.
 
 
 
Ic dancte u oec minne haddijs verdient
10.
Met alle alse een uwer armer vrient
 
Maer sint ghi mi ierst in u ioc spient
 
Haddi ye mijn gheluc ontsient.
 
 
 
Du doet goet den ghenen dien ghijs ont
 
Mi scijnt dat ghijs ghedoghen en cont
15
Dies droevet mijn herte dies claget mijn mont
 
Dies es mine cracht wel onghesont.
 
Waerdi minne minne alse ghi wel sijt
 
Waer soudi nemen vremden nijt
 
Daer ghi den gonen met dore snijt
20.
Die u gevet cussen in alre tijt.
 
 
 
Ya ghi sijt al minnen ghi sijt so vroet
 
Uwe name es minnen ende van prise soe goet
 
Hets emmer ghenoech al dat ghi doet
 
Wie dats blivet in den wedermoet.
 
 
25
Uwe name verciert uwe ghelaet verscoent
 
U ophouden verteert uwe gheven croont
 
Hoe sere ghi ons hebt ghehoent
 
Met enen cussene ghi al volloent.
 
 
 
Dus es minnen werc boven al ghedregen
30.
Ende al met haren streken beleghen
 
Hare waghe hevet alle waghe verweghen
 
Haer en es gheen vlien men ga haer ieghen.
 
 
 
God moete de minne benediden
 
Die wilt late hem el minne vrien
35
In mach hare wondere noch ialosien
 
Te minen wille niet vele belien.
 
 
 
Sint ghi al minne met minne vermoghet
 
Ghevet mi doer minne dies minne hoeghet
 
Te ghebrukene doer uwe hoochste doghet
40.
Doch hebdi verteert al mine ioghet.
 
Minne wilt dat minnen al minnen met minnen mane
 
Si hevet ópgheset hare hoochste vane
 
Daer bi leert men hare werken ghedane
 
Met claerre waerheit sonder wane.
 
 
45
Ghi edele keert u in minne ghestichte
 
Ende verciert u metter waerheit lichte
 
Dat u ghene demsterheit aen en vechte
 
Ghine pleget uwes lieves in minnen rechte.
 
 
 
Minne wilt al minnen van edelen fieren
50.
Ende datse hen met werken concordieren
 
Ende met memorien jubelieren
 
Ende met ghebrukene in hare juweren
 
 
 
Lof si der minnen ende ere
 
Haerre groter cracht ende haerre riker ghelere
55
Ende si moetse alle troesten van haren zere
 
Die gherne voldoghen in minnen kere.

Vorige Volgende