Logo DBNL
Werken. Deel 1: Gedichten (1875)

Werken. Deel 1: Gedichten

(1875)– Hadewijch–rechtenstatus Auteursrechtvrij

Vorige Volgende
tekstkritische noten

V.

 
Al droevet die tijt ende vogeline
 
Dan darf niet doen die herte fine
 
Die doer minne wilt doghen pine
 
Hi sal weten ende kinnen al
 
Suete ende wreet
 
Lief ende leet
 
Wat men ter minnen pleghen sal.
 
 
 
Die fiere, die daertoe sijn gedeghen
 
Datse onghecuster minnen pleghen
10.
Si selen in allen wege daer ieghen
 
Stout sijn ende coene
 
Ende al ghereet ontfaen
 
Si troest si slaen
 
Van minnen doene.
 
Der minnen plegen es onghehoert
 
Alse hi wel kint dies hevet becoert
 
Want si in midden den troest te stoert
 
Hine can ghedueren,
 
Dien minne gheraect
20.
Hi ghesmaect
 
Vele onghemoeder uren.
 
 
 
Bi wilen heet, bi wilen cout,
 
Bi wilen blode, bi wilen bout
 
Haer onghedueren es menechfout
 
Die minne al maent
 
Die grote scout
 
Haerre riker ghewout
 
Daer si ons toe spaent.
 
 
 
Bi wilen lief, bi wilen leet,
30.
Bi wilen verre, bi wilen ghereet
 
Die dit met -trouwen van minnen versteet
 
Dat es jubileren
 
Hoe minne versleet
 
Ende omme veet
 
In een hanteren.
 
 
 
Bi wilen ghenedert bi wilen ghehoghet
 
Bi wilen verborghen bi wilen getoget
 
Eer sel van minnen wert ghesoeghet
 
Doghet hi grote avonture
40.
Eer hi gheraect
 
Daer hi ghesmaect
 
Der minnen nature.
 
 
 
Bi wilen licht bi wilen swaer
 
Bi wilen donker bi wilen claer
 
In vrien troest in bedwongenen vaer
 
In nemen ende in gheven
 
Moeten die sinne
 
Die dolen in minne
 
Altoes hier leven.

Vorige Volgende