Logo DBNL
Werken. Deel 1: Gedichten (1875)

Werken. Deel 1: Gedichten

(1875)– Hadewijch–rechtenstatus Auteursrechtvrij

Vorige Volgende
tekstkritische noten

IV.

 
Nu sal die tijt ende de voghele droeven
 
Dies en sal hi niet behoeven
 
Die hem met waerheyden wilt voegen
 
Te werkene in hogher trouwen raet
 
Hi sal sinen lieve met trouwen ghenoeghen
 
Dats dat alrerijcste toeverlaet.
 
 
 
Hoe dat el metten tide steet
 
Die metten werken in waerheit geet
 
Hem es alle uren wel gereet
10.
Bloyen blijscap somer ende dach
 
Hi es altoes nuwe ende van niede heet
 
Hem en doet meer winter weder slach.
 
 
 
Die hem met trouwen in waerheit gheeft
 
Ende met waerheiden dan trouwen levet
 
Dat verhoelne woert wert hem gheseghet
 
Dat nieman vreemders en mach verstaen
 
Dan diet van smake ghevoelt al hevet
 
Ende in hoech gheruchte silentie ontfaen.
 
Na neder stille hoech gheruchte
20.
Volcomene troest ende anxteleke sochte
 
Ondanc hebbe hem daer iegen duchte
 
Sint dat al hevet dus groet ghewin
 
Die edele bloemen metter vrochte
 
Verstant ende merc vri edel sin.
 
 
 
Ay edele sinne waer sidi henen
 
Hoe moghedi u dus neder ghelenen
 
Die langhe ghetoent hebt ende ghescenen
 
Ochte ghi op trouwe altoes moest teren
 
Ochte ghi van trouwen ye wort gherenen
30.
Hoe moghedi u met minne generen.
 
 
 
Vele essere gheroepen ende scone ghetoent
 
Ende lettel vercoren wat hulpt verscoent
 
Die lose sijn selve doch meest gehoent
 
Alse trouwe na werken sal ghelden al
 
Ende si hare vriende alle croent
 
Met dat si es ende wesen sal.
 
 
 
Mer vri edele sinne ende wel gheboren
 
Beide gheroepen ende vercoren
 
En spaert cost noch pine daer voren
40.
Te levene in hogher trouwen vlijt
 
Uwe leven si al heilich toren
 
Tote ghi uwes lief gheweldech sijt.
 
Ay herten en laet u niet vernoyen
 
Uwe meneghe smerten u sal saen bloyen
 
Ghi selt alle storme dore royen
 
Tote dat ghi comt in dat weldeghe lant
 
Daer lief in lief sal al doer vloyen
 
Dies si hier edele trouwe u pant.
 
 
 
God moete den edele redene gheven
50.
Die hem verlichte dellendeghe leven
 
Die nu ghequetset sijn ende sere verdreven
 
Onder der wreeder vreemder slach
 
Alse lief in lief sal werden verheven
 
Hoe wel het hem dan liken mach.

Vorige Volgende