Briefwisseling van Hugo Grotius. Deel 11

4813. 1640 september 1. Aan A. Oxenstierna¹.

Excellentissime atque illustrissime domine,

Princeps Palatinus² itineri paratus exspectat commodum regis, ut ei valedicat. Rex dona quaedam ipsi parat. Ipse autem rex haesurusne sit in locis illis, ubi fuit hactenus, an venturus Chantiliacum, an ad S. Germani, dubitatur. Male ei rursum cum regina³ convenit, ideo quod Diepae deprehensus sit Hispanus quidam literas ab ipsa ad Chevreusiam⁴ ferens.

1 Gedrukt Epist., p. 643; Oxenst. Skrifter 2. afd. IV, p. 69.

2 Karl Ludwig van de Palts.

3 Anna van Oostenrijk.

4 Marie de Rohan, hertogin van Chevreuse; zij bevond zich in Brugge.

[p. 490]

Pergitur in fabricanda arce ad urbem Atrebatum.

Augentur in Italia Leganesii⁵ copiae. Et Galli quidem urbem Taurinorum suam fore sperant ante Septembris exitum ex penuria farinae, salis, pulveris bellici. Sed et salis et pulveris bellici multum in urbem immittit Leganesius in globis cavis, quos pondere viginti librarum magno numero fieri jussit. De farina dubitatur, verane sit tanta ejus penuria, an rumor spargatur, ut famem opperientes Galli ab urbis oppugnatione abstineant. Argentonus⁶, iuridicus regii illius exercitus, et Couvognius⁷, praefectus arcis Taurinorum, cum velut in tutis locis carruca ad viduam Sabaudicam⁸ proficiscerentur, intercepti ab hostibus et in arcem Mediolanensem perducti sunt.

Binga et Baccheraci arce amissis difficiles ad Rhenum receptus creditur habiturus Longavillanus⁹, ad quem nulla adhuc supplementa, quae diu exspectavit, mitti video.

Constantiae audimus praesidium esse Hispanicum; XV millia caesarianorum ad Spiram et Wormatiam coire; sex cohortes, id est regimenta, ex Austria per Franconiam petere aut Rhenum aut Tirolim. Cardinalis Hispanus cum parte militum apud Insulas - Flandriae oppidum est - citerius paulo Lamboius¹⁰.

Jacobus Sirmondus¹¹ cum in urbe Atrebatum repertos jesuitas regis jussu, cui est ab exomologesi, splendido convivio exciperet, addidit sperare se brevi idem officium exhibiturum sociis suae sodalitatis, qui essent Duaci, Cameraci et S. Audomari.

His diebus a parlamento declaratum est nullum esse matrimonium contractum a presbytero quodam, postquam is a romanensibus ad reformatos transierat.

Scoti equites nonnulli in Angliam ingressi passim libellos jecere acerbos in eos, quorum consiliis rex utitur. Neque inde spes adhuc internae concordiae affulget.

Deus, Excellentissime et illustrissime domine, Sublimitati tuae semper favens adsit.

Lutetiae, Calendis Septembribus ex novo calendario 1640.

Tuae Sublimitatis devotissimus cultor
H. Grotius.

5 Diego Mexía Felípez de Guzmán, markies van Leganés, Spaans goeverneur van Milaan.

6 René de Voyer d'Argenson, intendant van justitie.

7 Stainville, seigneur de Couvonges.

8 Christine de France, hertogin van Savoye.

9 Henri d'Orléans, hertog van Longueville.

10 Wilhelm, baron van Lamboy, bevelhebber in keizerlijke dienst.

11 De jezuïet Jacques Sirmond, Frans kerkhistoricus.

Harcurtio¹² rex mandata dedit pactiones faciendi, per quas Italia bellicis malis liberetur valde id urgente pontifice ac Venetis. Interim et supplementa quaedam Harcurtio ex Provincia adventant. Multum frumenti contrahitur in urbes proximas Galliae, ut inde Atrebatum urbi alimenta advehantur.

Cardinalis Riceliacus circa Ambianum manet. Cardinalis Hispanus munit Vitriacum, Arlosium, Pontem Aventini.

Archiepiscopus Burdegalensis¹³ Siciliam petere dicitur, cum alia parte navium Brezaeus¹⁴ esse ad Gades. Glenius¹⁵ Meissenhemi praesidium posuit.

Principem Thomam¹⁶ ex urbe Taurinorum evasisse rumor est, sed incertus.

12 Henri de Lorraine, graaf van Harcourt-Armagnac.

13 Henri d'Escoubleau de Sourdis, aartsbisschop van Bordeaux. Hij leidde de operaties ter zee tegen Spanje.

14 Jean Armand de Maillé, hertog van Brezé.

15 Gottfried Huyn, graaf van Geleen, keizerlijk bevelhebber.

16 Tommaso Francesco van Savoye.

Adres: Axelio Oxenstiernae, sacrae reg. Maj. regnorumque Sueciae senatori et cancellario.