Briefwisseling van Hugo Grotius. Deel 10

[p. 753]

4393. 1639 november 19. Aan Christina van Zweden¹.

Serenissima ac potentissima regina, domina clementissima,

Regi² ab itinere reverso et literas augustae Majestatis tuae binas in Augusto mense scriptas tradidi et negotium utrumque comprehensum iis literis sedulo commendavi.

Et de exercitu quidem ducis Vinariensis³ non multum mihi laborandum fuit. Curat enim eum rex ut suum.

De negotio D. marescalli Hornii⁴ rex prolixam voluntatem testatus cum concilio suo se acturum dixit. Praevideo difficultates, tum quia D. Feuquerius⁵ adhuc in hostium est potestate, tum quia exercitus Vinariensis per Johannem Waertium⁶ et Enckefortium⁷ libertatem Tubadelii⁸ obtineri posse sperat et in id enititur. Ego regi ostendi captivos istos duos a duce Vinariensi, qui eos ceperat, in id fuisse destinatos, ut marescallo Hornio eorum commutatione redderetur libertas. Credidisse ducem plurimum id ad suam pertinere gloriam; itaque hanc suam voluntatem significasse Majestati tuae, scripsisse eundem ac misisse ad regem saepius ad eam rem promovendam; in hac ipsa voluntate finisse eum dignissimam aeternis laudibus vitam. Non desistam apud ministros regis urgere hoc negotium.

Mitto et literas eorum, qui exercitui Vinariensi praesunt; unde intelligat Majestas tua, quantum sibi jus in exercitum ipsum et in ejus tractus urbes rex sibi acquisiverit.

Deus, serenissima ac potentissima regina, domina clementissima, Majestatis tuae vitam, valetudinem ac res perpetuo prosperet.

Augustae Majestatis tuae subditus obedientissimus ac submississimus
H. Grotius.

1 Gedrukt Epist., p. 579.

2 Lodewijk XIII van Frankrijk.

3 Bernhard, hertog van Saksen-Weimar, gestorven op 18 juli 1639.

4 Gustav Karlsson Horn.

5 Manasse de Pas, markies van Feuquières († 13 mei 1640). Hij was tijdens de strijd rond Thionville zwaar gewond gevangen genomen.

6 Johan van Werth.

7 Adriaen von Enkefort.

8 Georg Christoph von Taupadel.

Lutetiae, 9/19 Novembris 1639.