Briefwisseling van Hugo Grotius. Deel 10

[p. 34]

3931. 1639 januari 15. Aan A. Oxenstierna¹.

Excellentissime atque illustrissime domine,

Fuit iterum apud me comes Licestrius². Sermones ejus eodem perpetuo relabuntur non posse foedus iniri, nisi cognoscatur, quid sibi propositum habeant nostrorum arma. Ne cum Gallis quidem placuisse sibi foedus sub legibus, quales nunc Suedi postulant. Dimidium Pomeraniae videntur nobis concessuri Angli, si res ipsorum arbitrii fiat. Ego contra ostendi in foedere, quale cupimus, nihil esse iniqui et de Pomerania nos optimo jure niti.

Cum Lotharingo³ quicquam actum sibi iidem Angli negant. Quod antehac illos monueram, cogitarent de custodia regionis trans Amasium amnem, videntur in animum admittere. Nam de Gallis, an quid confecturi sint, dubitatur. Sed aiunt ipsos trans-Amasianos ordines deliberare de conducendo suam ad tutelam Hassico milite; praeterea vero Melandrum⁴ id moliri, ut ad exemplum infra-Saxonici foederis fiat infra-Rhenanorum.

Cum dicerem Licestrio, quod ad me perscriptum fuerat, residentem apud Helvetios Anglicum⁵ minus amice de Suedis loqui, negabat id esse verum. Nisi Licestrius de industria occultari ad tempus vult famam foederis, quod cuditur, crediderim ego malle Anglos arbitros esse pacis suo ex usu quam belli socios. Sed utrumvis volent, multum illis et auctoritatis et virium detrahent motus Scotici, qui adeo non resederunt, ut erumpant violentius.

Hyems haec nihil novi parit, nisi quod mire torquetur rex⁶ ob id, quod nupturire videatur Hautofortia⁷.

Landscrona, quam reddi convenerat, nondum quod sciamus in ducis Vinariensis⁸ venit potestatem.

Dux Mutinensis⁹ in Italiam rediit. Erfordenses, ut diuturnae sint suae induciae, metuunt. Aucta sunt praesidia et commeatus Cellae.

Dus Bavarus¹⁰ ex agris quae transportari possunt omnia in oppida convectari voluit. Idem S. Virginem a Gallicis partibus ad suas volens traducere in ejus se tutelam commendavit: ego vero divinae tutelae, Excellentissime et illustrissime domine, reginam¹¹ ac tuam Sublimitatem.

Tuae Sublimitatis cultor devotissimus
H. Grotius.

1 Gedrukt Epist., p. 495; Oxenst. Skrifter 2. afd. II, p. 563.

2 Robert Sidney, graaf van Leicester, extraordinarius Engels gezant te Parijs.

3 Karel IV, hertog van Lotharingen.

4 Peter Melander, graaf van Holzapfel.

5 Oliver Fleming.

6 Lodewijk XIII.

7 Marie de Hautefort (1616-1691).

8 Bernhard, hertog van Saksen-Weimar.

9 Francesco I d'Este, hertog van Modena.

10 Maximiliaan I van Beieren.

11 Christina van Zweden.

Lutetiae, 5/15 Januarii 1639.

Pecuniarium negotium et meum ob causas gravissimas et D. Marini¹² sublimitati vestrae sollicite commendo.

12 Charles Marin(i), Zweeds nieuwsagent betreffende Zwitserland en naburige landen.

[p. 35]

Delphinus¹ soluto linguae retinaculo sugit melius et multum lacte cocto utitur.

Novi sunt rumores de dirimendo fratris regii² matrimonio cum Lotharinga³.

1 Lodewijk XIV, geboren op 5 september 1638.

2 Gaston, hertog van Orleans, ‘monsieur’.

3 Margareta van Lotharingen.

Adres: Axelio Oxenstiernae, Sacrae Reg. Maj. Regnorumque Sueciae Senatori et Cancellario.