Briefwisseling van Hugo Grotius. Deel 9

3756. 1638 september 4. Van A. Oxenstierna⁴.

Magnifice ac generose domine legate, amice colende,

Annus iam labitur quartus, ex quo praesentium adhibitor, doctus ac modestus juvenis Daniel Jonae Behm⁵, informationi filii mei natu minimi Erici Oxenstiernae⁶ admotus, qui nunc officio suo penes me defunctus ac orbe patrio ulterioris doctrinae et experientiae causa exiens voluit ad iter hoc suum secundandum hisce meis literis commendatitiis muniri, quibus ad Magnificentiam tuam faciliorem sibi aditum patere confidit cumque id industria ac modestia sua meruisse visus est, non difficulter impetravit.

Amice proinde a Magnificentia tua requiro, velit eundem auxilia ac consilia tua implorantem, quibusvis benevolentiae signis prosequi eique pro spectata tua prudentia, quid facto opus sit, consulere in iisque informare, quae Magnificentia tua iudicaverit conducere ipsum scire ac patriae usui fore, simul etiam authoritate et amicitia qua penes alios Magnificentia tua pollet, quos adire ac quibuscum conversari iuvat haud deesse.

Quicquid beneficii in eum Magnificentia tua contulerit, grata is mente agnoscet, ego etiam istud vicissim demereri oblata occasione non negligam id potius daturus operam, quo facto ipso ostendam, quam sim.

Magnificentiae tuae ad quaevis benevolentiae
officia praestanda paratissimus amicus
Axelius Oxenstierna m.p.

4 Hs. Den Haag, ARA. Eerste afd. coll. Hugo de Gr. Aanw. 1911 XXIII no. 5.

5 Daniel Behmer (1611-1669).

6 Erik Oxenstierna (1624-1656).

Stocholmiae 25 Augusti

A.^o 1638.

In dorso schreef Grotius: Cancellarius 25 Aug.