Briefwisseling van Hugo Grotius. Deel 9

3519. 1638 april 5. Aan F. Sprecher².

Nobilissime Domine,

Repetitum inter nos literarum commercium gaudeo neque id desinam mea ex parte colere.

Rhaeticorum rerum mutationem doleo et Rhaetorum et communis rei causa. Minus tamen me feriit malum, praevisum pridem, haud obscure se ostendentibus causis. Ducis Rohanii³ virtutem semper sum admiratus, ad cujus veteres laudes non leve pondus adjectum est, cum priore ad Rijnfeldium praelio res protestantium Germaniae ultro ivit adjutum suoque periculo et vulneribus accendit socios. Captis jam hostium ducibus, signis, Rijnfeldio speramus fore, ut et Helvetii protestantes apertius faveant causae et Germanicae civitates sequantur Germanum principem⁴ Germaniae liberatorem.

Ego quae evenere memoriae recolens video nihil tantum nocuisse protestantium causae, quantum ipsorum inter se aperta nimis dissidia, quae cuncta pravitatibus et suspicionibus implerunt neque consilia tantum socialia corruperunt, sed et conspectu discordiarum audituque non paucos impulerunt in alios greges, nonnullos etiam tenuere velut in bivio διαϰϱινομενούς. Sed his malis humana ope validioribus Deus, ubi ipsi visum erit, medium adfert.

Galli multa se pecuniis suis sperant posse efficere, verum novit eas artes Hispanus⁵.

Nec si muneribus certes concedat Iolas⁶.

Aut si pro Maroniano versu Terentianum mavis

Et habet quod det, et dat nemo largius⁷.

Verum ut ad Hispanum quoque poëtam, quando garrire tecum dulce est, veniam:

2 Gedrukt Epist., p. 415. Fortunatus Sprecher von Bernegg (1585-1647) genoot bekendheid als staatsman en als historicus.

3 Henri, hertog van Rohan.

4 Bernhard, hertog van Saksen-Weimar.

5 Philips IV.

6 Virgilius, Eclog. 2. 57.

7 Terentius, Eunuchus, 1078.

[p. 193]

 

Munera magna quidem mittit, sed mittit in hamo

 

Et piscatorem piscis amare potest?¹

Sed ut puto concutiet aliquando aegida suam Pallas² Rhetica.

Honorem tibi a rege christianissimo³ collatum gratulor neque deero, ubi se dabit occasio, virtutibus tuis dare testimonium, quippe Nobilitatis Tuae amans more veteri ac simplici.

Tuae Nobilitatis observantissimus
H. Grotius.

1 Martialis, Epigr. 6. 63. 6-5.

2 Vgl. Ovidius, Metam. 2. 753-755: (Pallas) traxit suspiria motu, // ut pariter pectus positamque in pectore forti // aegida concuteret.

3 Lodewijk XIII van Frankrijk.

Lutetiae, 5 Aprilis 1638.