Briefwisseling van Hugo Grotius. Deel 6

2484. 1636 februari 21. Aan L. Camerarius¹.

Illustrissime Domine,

Post felices ad Colmariam Schlestadumque Valettae cardinalis² successus missa pars equitis Hagenoviam intulit pulverem bello et pecuniam stipendio. Quo minus eodem tempore frumentum importaretur, obstitit Argentoratensium cunctatio. Sed accepti aliunde sacci 400 onusti frumento in parato erant sperabanturque eo perduci posse ipso Valetta ob cibi pabulique maxime inopiam coacto, quod habebat, agmen retro ducere ad Spinale, unde Tullos atque inde aulam hanc petiturus dicitur.

Dux Parmensis³ omni hic voluptatum donorumque genere accipitur, dum ager Placentinus partim a sociis partim ab hostibus raptatur; eam se maxime in regionem injiciente bello. Villa⁴ cum Gallis ad Stradellam, ad Tombium et Guardamiliam cum Hispanis Gambacurtius⁵ se immuniere, Ticinensi agro defendendo servandoque a Genua itineri equitem misit praefectus Mediolanensis⁶ aliaque manu Vespolam et loca Vercellis non longe invasit. Ita ut vix dignis memorari rebus ibi tempora transiguntur.

Hic tum a conventu Lunemburgensi tum ab arcanis Batavorum cum hoste colloquiis ingens est metus. Meti parlamentum comitibus Germanis ibi exsulantibus interdixit, ne domi suae lutherano more facerent sacra.

Adversus hujus regni reformatos vehementem his diebus orationem habuit ad regem⁷ episcopus Aurelianensis⁸.

Digniora scribi hybernum hoc tempus nobis non suppeditat. Itaque cum bonis votis finio.

Illustrissimae Tuae Dominationi omni cultu observantissimus
H. Grotius.

1 Copie Uppsala, UB., cod. 388a, Ep. 36. Gedrukt Epist., p. 218. Geadresseerde, Ludwig Camerarius, was ordinarius gezant van Zweden in Den Haag.

2 Louis de Nogaret d'Epernon de La Valette.

3 Odoardo Farnese, hertog van Parma.

4 Guido, graaf van Villa.

5 Geraldo Gambacorta (†juni 1636), luitenant-generaal van de Spaanse cavalerie.

6 Diego Mexia Felipes de Guzmán, markies van Leganés.

7 Lodewijk XIII van Frankrijk.

8 Nicolas de Nets, van 1632 tot zijn dood in 1646 bisschop van Orléans.

Lutetiae, 21 Febr. n.c. MDCXXXVI.

Adres: Ludovico Camerario, Reginae Regnique Sueciae Consiliario et Legato apud Praepot. Ord. Foeder. Belgii.