Briefwisseling van Hugo Grotius. Deel 4

1448. 1629 november 23. Aan Willem de Groot³.

Mi frater,

Nihil haec septima mihi a vobis attulit. Credo literas latere penes aliquem, qui sit in comitatu Castellionaei⁴, qui jam huc advenit, nihil, ut videtur, certi de induciis nostris adferens.

Tilenus⁵ noster valde ex articulis aegrotat et propemodum sine intervallis. Tamen in illo dolore non oblitus rerum suarum reposcit literas Casauboni⁶, quando ut edantur ab Elzeviriis⁷ stultum sit sperare.

Ego vix sustinere possum flagitationes amicorum de Grolla⁸, quibus me obstrinxi et nunc eo magis vanus videor, quod librarii satis multa exempla habeant. Interim etiam tempus omne aliquid inde redigendi perit.

3 Gedrukt Epist., p. 822.

4 Gaspard de Coligny, graaf van Châtillon; zie III, p. 121 n. 1.

5 Daniel Tilenus.

6 Vgl. n^o. 1376, p. 19 n. 5.

7 Bonaventura en Abraham Elzevier te Leiden.

8 Grollae Obsidio, 1629; zie Ter Meulen-Diermanse, n^o. 712.

[p. 130]

De esculentis sane si D. Langeracensis¹ cataplum exspectabimus, vereor ne sit συϰίνη ἐπιϰουϱία. Itaque censeam prima navi mittenda.

In Italia bellum fervet et Mantuae suburbia agerque omnis tenetur hostili exercitu. Domesticae suspiciones his obstant rebus externis. Nam frater regius² nondum in aulam venire inducitur et sui metu magnas regis copias in illo fine detinet.

Praeter haec nihil habebam nunc quidem. Quare desinam Deo rogato, ut te, parentes, conjugem tuam³, liberos, propinquos et amicos sospitet.

Valete.

23 Novembris 1629.

Tui amantissimus frater
H. Grotius.

1 Gideon van den Boetzelaer, heer van Langerak, ordinaris gezant van de Republiek bij het Franse hof.

2 Gaston, hertog van Orléans.

3 Alida Graswinckel.