Briefwisseling van Hugo Grotius. Deel 2

743. 1622 April 14. Aan Willem de Groot².

Tune, mi Frater, ut gratias habeas mihi, cui infesta nimium fortuna nunquam hoc indulsit, ut quis tibi frater essem ostenderem? Tu interim nunquam defatigaris aerumnas nostras sublevare et absentis vices subire, quae si repensare unquam potero, caeteras iniurias facile fortunae sum condonaturus. De centum florenis numerandis scripseram³, ut quod debeam Rotterodami inde, quia hic pecunia non suppetebat, exsolverem. Caeterum LXX alios cupieram penes te manere, unde sustineres quotidiana in res meas impendia. Quod si res integra est, ita fiat rogo. Mihi subquaestor⁴ de pecunia moras nectit, nescio an quia ita mos est serpentibus Hesperidum mala servantibus. Sed quidquid eius sit, existimationi consulendum est, ac proinde urgenda libri nostri de quo scribis editio⁵. Scripsi ea de re et ad affinem Nicolaum⁶, quem cessurum meis rationibus non dubito. Vestras notas avide expectabo, et Hexabibli⁷ exemplum si quis amicus advenerit. Ego quod libere ad me scribis in magna parte beneficii pono, atque in ea re ut pergas precor; neque dubites utcunque multis incommodis premar secuturum me consilia fortiora. Immunitas iuris albinagii simul cum publica tutela a Rege omnibus illis concessa est, qui ob nuperas dissensiones apud nos

2 Gedrukt Epistolae p. 764.

3 Zie n^o. 735.

4 Zie n^o. 739.

5 Verantwoording; zie p. 76 n. 1.

6 N^o. 744.

7 Bewijs van den waren godsdienst; zie p. 26 n. 6.

[p. 202]

damnati aut in exsilium acti sunt; sed de ea re instrumentum nondum subscriptum signatumque est, sed exspectatur¹. Additamentum de quo scribis mitto, et alterum. Alia tria aut quatuor antehac ad affinem misi locis adscribenda. Pro transmisso librorum indice² grates ago; ipsos nondum mitti opus est. Excerpam qui erunt maxime necessarii. Carmen tuum rogo ubi quis amicus venerit mittas cum Hexabiblo. Uxor te salutat; quod et alios facturos crede, ubi ipsis a te salutem nuntiavero. Vale mi Frater. Lutetiae 14 Aprilis 1622.

Patri pro Carmine summas habeo gratias; ipsique et per ipsum amicis, praesertim quos in epistolas nominat me commendo. Librum qui in Zelandia est³ ad vos remitti iussi. Memineris quaeso de Eclogis Stobaei Physicis⁴ et de libellis Hottomanni⁵.

Tui amantissimus Frater
H. Grotius.

1 Brandt, Historie der Reformatie IV p. 748 vv. Pfl. Knuttel 3371, 3372.

2 Zie p. 180 n. 3; p. 191 n. 14.

3 Het handschrift van de Verantwoording; zie n^o. 744.

4 Zie p. 191 n. 9.

5 Zie p. 191 n. 15.