Archives ou correspondance inédite de la maison d'Orange-Nassau (première série). Supplément

[1563]

5.
L. de Schwendi au Prince d'Orange (ms. l.) Nouvelles. Il loue la modération des Seigneurs.

Monseigneur! Envoiant présentement mon laggay¹, ce porteur, vers Bruxelles, n'ay voulu faillir de baiser à vostre Seign^e les mains. Il me doit [amvoier] des chiens de chasse; si v.S. me veult pourveoir d'un couple des bons, elle me fera plaisir; car, si bien je suis maulvais chasseur, si me la fault-il entretenir. Aussi, quand l'on est à la maison, l'on ne peult moings que de chercher quelquefois quelque passetemps.

Je suis bien aise quand j'entends que vous aultres Seigneurs procédés en vos affaires discrètement et avec modestie, ayants tousjours pour recomendé le debvoir envers le Prince et la patrie et ne donnants lieu aulx passions particuliers plus avant que la raison veult et la conservation de vostre bonne réputation: le temps en besoignera et fera son effect, mais l'occasion veult estre bien et meurement embrassée.

Des nouvelles n'y a pas grand chose icy alentour. Les Hugenods ne se fient encore trop de leurs affaires et cherchent tousjours leur correspondence avec les Princes Allemands. La soubspezon et diffidence envers nostre Roy ne cesse en cependant, ny le bruict de plusieurs practiques, desquelles toutesfois ne fais grand fondement. Bien est vray que ceulx de Guise cherchent assistance pour venger la mort de leur frère, mais je ne sçay qui se vouldra fort

1 Jaquais.

[p. 13*]

⁺mesler. Mesmement j'espère que nostre Roy sera mieulx advisé.

De la guerre de Denmarck si v.S. at aulcunesfois de nouvelles, je supplie qu'elle les face copier par son secrétaire, pour me les envoier avec l'ordinaire.

Je suis soucieulx pour Mons^r le Conte de Schwarzenberg et siens et vos frères.

A tant, Monseigneur, je prie le Créateur vous donner l'entier accomplissement de vos désirs, me recomendent très-affectueusement et humblement à v.S. - A Kneusheim, le 7 de septembre l'an 63.

De v.S. très-affectionné serviteur,

Lazarus de Schwendi.

Le Roy de France doit venir de Lyon à Nancy et depuis à Mez. Les Lorrainois ne se fient trop, puisqu'il doit venir avec grand équippaige.

Si les François commencent la guerre avec les Anglois et le Pape les excomunie et adjoinge¹ le roiaulme à nostre Roy, nous verrons nouvelles garboulles, car les protestants se resentiront, et ne demeureront les Anglois sans support et aide, et si nostre maistre auroit quelque emprinse contre eulx devant la main, il ne luy peult advenir plus grand empeschement que quand le Pape se mesle, comme il est dit.

A Monseigneur le Prince d'Orange.

+ 1563.

1 adjeigne.