Archives ou correspondance inédite de la maison d'Orange-Nassau (première série). Tome VI 1577-1579

Lettre DCCLXXV.
W. de Breyll au Prince d'Orange. Nouvelles diverses.

Monseigneur... Don Johan a eu ung Ambassadeur auprès du Duc de Julliers le 22^me de ce moys présent. Il estoit venu en grand haste. Je le vis faire la révérence du matin, quand son Exc. alloit à la chasse. Sa légation est tenu fort secrète, car elle ne fust communiquée qu'à ung seul. Ce mesme jour le Duc est allé disner avecq le fils du Duc de Bavières, Evesque de Frisinghen. Le disner et le département d'ensemble ne se passoit sans grandes courtoisies et baise-les-mains. Je fus, maugré moy, participant du dict disner, d'aultant que le Duc de Julliers quelques jours devant m'avoit faict venir en sa Court.

L'Évesque de Bremen, grâces à Dieu, est esleu aussy

[p. 212]

⁺Evesque de Paderborne. Je m'en part encor ce jour pour aller trouver son Exc.

La journée de l'élection de l'Electorat de Sainct-Empire et Archevesché de Coloingne, serale 2^me du moys de décembre suyvant. Plusieurs y prétendent, sur tous aultres le Duc de Bavières faict bien ses efforts pour y pouvoir parvenir.

De France j'ay seures nouvelles que la paix y est faicte; Dieu vueille donner sa grâce au Roy qu'elle soit maintenue et avantageuse pour nous aultres du Pays-Bas.

Les Espaignolz retournent à force avec quelques mille Italiens. Il ne fault doubter que le Duc Erich⁽¹⁾ de Braunswyck ne face bientost marcher ces mil chevaulx dont il a receu desjà longtemps son ahnridtzgeldt du Don Johan. Les Estatz se peuvent asseurrer que Don Johan ne leur face une bonne guerre, s'il ne se donnent de garde de bonne heure... Vischenich, ce 25 d'oct. 1577.

De v. Exc. très-humble et très-obéissant serviteur à jamais,

Winandt van Breyll.

A Monseigneur le Prince d'Orenge.

+ 1577. Octobre.

(1) Duc Erich. Il n'arriva pas de si-tôt. Languet écrit à la fin de mars 1578: ‘Dux Ericus ducit ad Joannem Austriacum tria millia equitum, qui intra paucos dies recensebuntur in Episcopatu Monasteriensi:’ ad Sydn. p. 318.