Archives ou correspondance inédite de la maison d'Orange-Nassau (première série). Tome V 1574-1577

† Lettre DCLXXV.
Le Prince d'Orange à M^r de St. Aldegonde. Danger de la négociation avec Don Juan.

Monsieur de St. Aldegonde! Ayant quelques jours avecq grand désir attendu d'avoir de voz nouvelles, m'est finallement hier venue vostre lettre du 28 jour de l'autre mois, laquelle m'a esté aggréable, tant pour avoir par icelle entendu les particularitez de delà, que pour estre relevé de la peyne où j'estois qu'auriez couru quelque dangier, vous priant à ce regard de m'escripre le plus

[p. 556]

⁺souvent que pourrez, pour oster vostre femme⁽¹⁾ et moy hors de tout soubçon de quelque adverse fortune vostre. J'ay bien attentivement leu tout le contenu en vostre lettre, vous asseurant que ce n'a esté sans grand marrissement de coeur, voyant les irrésolutions qui se passent par là, et que les affaires de si grand poix soyent par aucuns maniez avecq si peu de considération du bien ou du mal qui en doibt succéder, ne considérantz point l'entière ruyne qui menasse, non seullement nous aultres, mais aussy tous les Pays-Bas en général, si ce faict n'est manié dextrement et avecque constance magnanime et digne de si haulte entreprinse: que toutesfois estant par delà encoir tant d'hommes de sçavoir et d'entendement, je veulx espérer qu'ilz ne fauldront de faire tous bons debvoirs et offices en ce qu'ilz verront concerner le bien et advanchement de la cause commune; de tant plus que, comme j'entens par vostre lettre, la légation qu'on a envoyé vers Don Jéhan d'Austria, tend seullement pour luy dire que l'on ne veult traicter avecq luy, jusques à tant que les Espaignolz soient sortiz. Je me confie aussy que pendant vostre séjour illecq, vous les assisterez de vostre bon conseil et advis, selon que sçavez la grandeur de ce faict le requérir et nous importer... Le 3^me jour de décembre 1576.

+ 1576. Décembre.

(1) femme. Marnix fut marié trois fois; d'abord à Philippine de Bailleul; puis à Catherine de Eeckeren; enfin à Josine de Lannoy: te Water, Verb. der Edel. III. p. 40.