Archives ou correspondance inédite de la maison d'Orange-Nassau (première série). Tome III 1567-1572

Lettre CCCLXXIII.
G. du Bois à Hugues de Haynault. Nouvelles diverses.

Laus Deo, en Anvers, ce premier jour de juillet.

S^r Hughe, yer au disner ay recheut la vostre de 27 du passé et le contenu d'icelle bien entendu, dont, quant à ce que ne cognoissies point Claes Symon, ny Peeter et

[p. 455]

⁺Heyndrick [Phs] (ce sont de noz amys avecque lesquels avons faict amictié et demeurent en Hollande, l'ung à Horne, l'aultre à Enchuyse et le dernier à Dort) dont, parceque dictes villes sont tourcnées du costé de ces geulx, avons estés contraints de chercher leur amitié, affin qu'ilz nous ayderoyent à parvenir aux debtes que avons par tout le dict pays, ce que nous ont promis de faire .... De nouvelles n'avons icy chose de moment¹ depuis noz dernières, saulff que touttes les villes de Hollande sont quasi révoltées, reste Amsterdam, laquelle est pareillement en bransle, mais à ce que entendons ont conclu de n'accepter garnison ne d'ung costé ny d'aultre. Rotterdam tient bon, à cause des Espagnols que sont dedans, lesquelles laissent morir les femmes et enfans en dicte ville de faim, que est grand pitié. A Uttrecht sont pareillement quelques Espagnolx au chasteau, et y est Mons^r de Bossu avecque quelques gens, qu'i ha là eslevé au pays [par ains]. Nous sommes icy en paraison² bonne quiétude, parce que y avons ung regiment de dix enseignes de Wallons, lesquels nous font bonne garde. Du S^r George n'avons aultre nouvelle depuis les dernières à vous envoyées; quant en entenderons aultre, vous en donnerons avis. Nous l'attendions icy plus brieffement qu'il me semble qu'il ne sera, dont en sommes marrys; car seroit bien besoing qu'il viendroict bien pour donner ordre à beaucop de choses par ce temps garboilleux que nul ne scaict ce qu'il ha de faire: s'yl estoit icy, avons espoir qu'il y feroit bon profict, car y ha des marchandises quy se présentent à bon marchié. J'oublyoye à vous dire pour nouvelles que ceux de Vlissinghes ont boutté oultre les

+ 1572. Juin.

1 importance, momentum.

2 passablement.

[p. 456]

⁺digues, tant pour leur seurté (d'aultant qu'ilz avoyent peur de trahison), que pour se venger des bruslements que Mons^r de Beauvois faisoit par le plat pays de Walcheren, dont n'y ha doubte que la ville de Middelborch ne souffrira grand domaige. Le Seigneur veuille par tout consoler les affligés, car en y a pour le présent beaucop en ces Pays-Bas.

Jorge du Bois.

Au S^r Hughe de Hainault, marchant, demeurant à Aeth. Payés le porteur.

+ 1572. Juin.