Archives ou correspondance inédite de la maison d'Orange-Nassau (première série). Tome III 1567-1572

* Lettre CCCLXXI.
Le Prince d' Orange à Jean de Haynault. Même sujet.

Laus Deo, 27 juin de Francfort.

Sire Jehan de Haynault, j'ay receu voz lettres du 10 et 18 hier au soir, après que j'avoye despeché la [réponse] à celle du 15. J'ay esté fort joyeux du bon suceès de noz affaires et marchandises de par delà, mesmement en ung tamps si troublé, lorsque les coeurs et affections des personnes se changent légèrement, mais puisqu'il plait à Dieu nous donner si bon heur, nonobstant les menées d'aucuns qui nous voudroyent bien veoir renversez, lesquelz pensoyent soubz main nous faire mille petites tours, il fault certes prendre courage, et nous efforcer de passer toutes les difficultés qui se présentent, et pourtant vous prie de entretenir noz créditeurs comme avés faict au passé. J'espère bien que ceulx qui se pensoyent mocquer de nostre ruine, se trouveront honteux eux-mesmes. Car quant à moy je fay mon comte de partir demain pour m'acheminer vers le Pais-Bas, avecque toute la monnoye d'or et d'argent que j'ay seu fournir; il reste seulement

[p. 452]

⁺ce que desjà par plusieurs fois vous ay mandé, c'est à scavoir que je puisse trouver moyen de satisfaire à ma promesse touchant la denrée de chamois et buffetins, pour à laquelle furnir je vous prie de trouver quelque moyen, d'autant que le tout gist en cela. Toutesfois je ne désire pas que vous vous mettiez pourtant en hazard, mais si autrement vous pouvez imaginer quelque moyen, vous prie de le fère. Vray est que l'asseurance de mon frère Lambert, telle comme desjà vous ay mandé itérativement, me servira beaucop, mais si faudrat-il nécessairement avoir quelque chose de content¹ pour leur satisfaire, et pourtant vous prie d'y employer voz cincq sens et en discourir avecque mon dit frère, auquel vous ferez mes recommendations, luy disant que je suis en bonne disposition, Dieu mercy, et ne désire autre chose que de le venir trouver, ce que j'espère de fère en brief.

Au reste je vous prie de solliciter tous noz amis de pardeà, affin que une fois ilz monstrent si à bon escient ilz nous portent affection ou non, pour nous ayder en nostre besoing; car si nous venons à ne pouvoir furnir à nostre besoing et par ce moyen tombons en bancqroulte, vous voyez que cela redondera à leur grand déshonneur et désavantage.

Le tout vostre,

George Certain.

Soit donné à Jehan de Haynault mon bon amy, à Aath.

+ 1572. Juin.

1 comptant.