Archives ou correspondance inédite de la maison d'Orange-Nassau (première série). Tome I 1552-1565

Lettre CXV.
Le Prince d'Orange au Comte Louis de Nassau. Il désire sa venue.

Mon frère. J'ay receu avanthier bien tart vostre lettre, et vous eusse hier respondu, mais Madame alloit à la chasse où eumes certes ung gran plaisir, car il y vint vi

[p. 418]

⁺ou vii gran cerfs et en primes que deus..... Pour venir à respondre à vostre lettre, je trouverois bien nécessaire que, par vostre présence, Madame nostre mère et mes frères fussent bien informés combien qu'il nous amporte le faict de mon frère le Conte Henri, affin qu'ilx y volussent prendre une telle considération, que l'on sceusse ung fois une totale fin, pour ce¹ point rompre la teste en vain; d'aultre part aussi vous sçavés comme je suis astheure seul issi, de sorte que je désirerois bien vostre présence pour plusieurs choses trop longues à escrire, et voi bien que avés bien des affaires de l'aultre costé aussi, de sorte que ne sçay que dire, sinon qu'il me samble que si vostre absence ne seroit plus que xv jours, que porriés faire ung tour en ce temps à Dillenbourg, mais si ce debvroit estre pour ung mois, aimerois mieulx que leur mandissiés le tout par escrit et voir la responce qu'ilx vous donneriont. Elle porra ester telle que porriés remestre vostre allée par delà pour ung aultre fois, attendant que aurions mis quelque ordre à nos affaires issi; néamoings le remés à vous d'en faire comme vous semblerat le melieur...

Mons^r de Bréderode m'at escript comme Mons^r le Duc de Clèves viendrat à Vianen, me priant m'y voloir trouver. Je luy ay rescrit que, sassant le jour préfix, que je me trouveray. Je vauldrois bien que fuissiés là aussi, mais il fauldroit avoir cinq ou six cors² pour les amvoier l'ung deçà et l'aultre de là.... De Brusselles, ce xxii d'aust A^o 1565.

Vostre bien bon frère à vous faire service,

Guillaume de Nassau.

A Mons^r le Conte Louys de Nassau, mon bon frère.

+ 1565. Août.

1 se.

2 corps.