Lotharivs I. van dien name.
Sone van Lodewijck die Goedertieren, Keyser, die achtste Hertoch van Brabant.
Ga naar margenoot+INT rijck van Lodewijck is gesuccedeert Lotharius Roomsch-Keyser, Coninck van Italien ende Austrasien als den oudtsten sone, den achtsten Hertoch van Brabant. Nademael dat hy met sijn broeders Ludouico ende Carolo grooten twist hadde gehadt ende bloedige oorlogen gevoert na die doot sijns Vaders om die deylinghe vande Vaderlijcke erffelijckheden ende Rijcken, want die twee voorsz. broeders en wilden niet gedoogen dat Lotharis haren outsten Broeder soude als Keyser regneren, sonder haren consente, soo hebben sy teghen hem gheconspireert, ende bloedighe oorlogen ghevoert, den tijdt van dry iaren, inde welcke den gheheelen Edeldom van Vranckrijck verslaghen wert, behaluen noch een groote menichte van duysenden. Maer zijn ten lesten met malcanderen eendrachtelijc ouercomen, te weten, dat Charel de Caluwe soude hebben west-Vranckrijck, dat den naem van Vranckrijck behouden heeft. Lodewijck hadde Duytsch-landt, vanden Rhijn totter Eluen, ende Donouwe. Maer Lotharis bleef Roomsch-Keyser, ende Coninck van Italien, mitsgaders oock vanden lande, t'welck tusschen beyde sijnder broeders landen lach, te weten vanden Rhijn totte Schelt, dat is oost-Vrancrijck, oft groot Lotrijck, t'welc hy tot een Hertochdom verheuen heeft, willende dattet van sijnen name Lotrijck soude ghenoemt worden, waer van daer na die Princen van Brabant Hertogen van Lotrijck genoemt werden. Aldus bleuen dese dry gebroeders hier na in goede vrede ende ruste. Maer na sommige iaren heeft hy dat rijck ouer-gegeuen sijnen sone, ende aen die sijne oorlof nemende, heeft die werelt verlaten, ende is een Monick gheworden int Clooster van Prunien, liggende in Ardenen, nademael dat hy 36. iaren had geregneert. Ende is daer na een salighe doot ghestoruen den 29. dach der maent Septembris. Carolus Coninck van Prouincien ende Bourgoegnien, is sonder kinderen ouerleden.
Lodewijck sijnen sone en heeft niet lange geregneert, maer is gestoruen, sijn vader noch leuende, die geen erfgenamen achter-gelaten en heeft.
Inden tijt vanden voorseyden Lotharis, was in Duytsch-lant eenen alsulcken Ga naar margenoot+ grouwelijcken honger, als dat sommige menschen deur den wtersten hongers-noot ghedwongen werden haer eygen kinderen t'eten, allen miserie te bouen gaende.
Oock heeft het in sijnen tijt, te weten, by de Brixiaensche stadt dry dagen ende nachten bloet geregent, ende oock sprinchanen, in onbegrijpelijck getal, hebbende vi. vleugelen ende twee tanden, bedeckende dat gantsch aertrijc in Gallien oft Vrancrijc gelijc den sneeu, bederuende allen die vruchten vander aerden. Dese werden ten lesten met eenen stormenden wint inder zee gheworpen, die sy weder wt wierp op t'lant, causerende een alsulcken vuylen vochticheyt ende afgrijselijcken stanck datse die locht daer deur infecteerden ende fenijnich maecten, soo datter een groote dierte ende sterfte na-gevolcht is. Den Tijber vloede soo hooghe, sulcx datmen te Roomen van d'een straet in d'ander met schuyten moeste vaeren. Met desen ouervloet werden veel huysen om-geworpen, boomen wter aerden geruckt, oock swom dat coren ende t'saet metten water wter aerden. Dese plagen gheschieden binnen Roomen tweemael in een iaer.
Auteursrechtvrij