Chroniicke vande Hertoghen van Brabant

[fol. *3r]

Den Auteur tot den ghoetwillighen Leser.

AL ist by al dien (beminde Leser) dat onsen eersten vader Adam die wijsheydt, ende clare kennisse, niet alleen van sijnen createur, maer oock van die creaturen, als vanden loop der Sonnen, Mane, Planeten, Sterren, proprieteyt der dieren, ende cruyden, ghesteenten, daer hy mede begaeft was, door d'onghehoorsaemheydt ende t'ouertreden des Goddelijcken ghebodts, iammerlijck verloren heeft. Soo is nochtans inden mensche noch ghebleuen een groote begheerte, om te comen tot kennisse ende wetenschap van veel dinghen, besonder van saecken ende Historien ouer langhe voor sijnen tijdt gheschiedt. Waer toe die boecken vande Chronijcken ende Historien seer nut ende dienlijck zijn, eensdeels tot leeringhe ende onderwijs, niet alleen van t'ghene datmen behoort nae te volghen, maer oock van t'ghene datmen behoort te schouwen. Tot desen propooste seydt den vermaerden ende eloquenten Orateur Cicero lib. 2. de orat. aldus: Historia testis est temporum, lux veritatis, vita memoriae, magistra vitae, nuntia vetustatis. dat is: Die Historien zijn een ghetuyghe des tijdts, een licht der waerheydt, een leuen der ghedenckenisse, een meestersse des leuens, ende een claerheydt des ouderdoms. t'Selfste verclaert noch een ander oudt Leeraer inder Schrifturen, aldus: Waert saecke dat Godt die Heere den sterffelijcken mensche met prouisie der boecken, Chronijcken en Historien niet en hadde voorsien, de negligentie ende vergetentheyt, soude alle glorie ende ciraet des werelts bedecken ende verduysteren, want wat kennisse souden wy hebben van die scheppinghe des werelts, &c. Hierom hebben soo wel de Griecken als de Romeynen historien ende acten beschreuen, om dat de naecomelingen souden weten van hun voor-vaders te spreken. Arrianus verhaelt ons de gesten van Alexander de groote, Thucydides en Herodotus van de Griecken Iulius Caesar sijn eyghen feyten, Titus Liuius, ende Dionysius Halicarnasseus ende meer andere de oorloghen vande Romeynen Suetonius heeft ons ooc achterghelaten t'leuen ende acten vande twaelf Roomsche Keysers. Maer laet ons dese laeten vaeren die heydenen waren, veel vromer ende vaillanter hebben geweest ons Hertoghen van Brabant, daer wy af schrijuen, die alle met de ken-

[fol. *3v]

nisse des Christen gheloofs verlicht zijn gheweest, als datter oock veel heylighen onder gheleeft hebben (alsoo den Eerweerdigen ende geleerden Heere Henricus Costerius ghetuycht) iae tot den ghetaele van meer dan vier hondert, soo wel Canonizati als beati. Ist dan niet wel reden, dat alsulcke Christen Princen int licht worden gebracht? Want al hebbense sterffelijck gheweest, nochtans so leeft haer memorie noch, eensdeels door de boecken van neerstige schrijuers, ooc eensdeels om hun vrome feyten ende Christelijcke daeden. Die welcke wy nae ons cranck vermoghen hier hebben int cort gesocht te stellen, om dat oock soo wel int duytsch als int Latijn ende Franchoisch hun leuen bekent soude zijn. Ende om dies wille datter luttel oude boecken zijn die hier van mentioneren, ende het raeden hier in dangereus is soo bidde ick v, beminde Leser, mijnen aerbeydt int goet te willen nemen, ende indien ghy daer eenighe erreuren bevindt, daer in patientie te nemen.