Metamorphosis naturalis

XIV. Veranderinge.

HOewel de Rupsen meest alle by de Bladeren leven, ende daerom niet geern vande selfde wijcken, maer altoos daer ontrent sich onthouden; so en is nochtans dit in allen niet waerachtich. Want dese Rupsen hebben haer verblijf inde Aerde, ende schuylen inde Aerde so langh het dag is, ende komen eerst te voorschijn met de duysternisse, ende doen by nachte so veel provisie van eten op, als voor den aen-staenden dach ghenoegh is, ende zijn also eenichsints de Vleder-muysen ende Nacht-uylen ghelijck,

[p. *23]

[p. 51]

ende daerom heb ick hem den Nacht-uyl ghenaempt. Sy eten seer geern de jonghe scheutjens van verscheyden kruyden als onder anderen van kruysken-kruydt ende van teskens-kruydt, welcke kruyden beyde van verkoelenden aerdt zijn.

Dese Rups stelde sich tot veranderinghe den 28 April ende is daer in ghebleven tot op den 9 Junii, ende doen quam daer uyt eenen donckeren Uyl, welcke sich by daeghe niet en laet vinden, maer alleen als het duyster is, ende onthouden haer inde hoven daer verscheyden Kruyden gheplant werden, ende ontrent de bloemen uyt welcke sy haer voedtsel halen.