Declaratie van dese nauolghende Epistele.
SAppho was eẽionge maecht de welcke seer gheleert was, ende heeft veel dingen bescreuen, soo datse oock onder de Poeten mede gerekent wort. Dese Sappho wert ontstekẽ met grooter liefden, en beminde eenen iongelinck die geheeten was Phao, diemẽ scrijft dat de schoonste was vanden heelẽ lande. Nae veel minlijcke conuersatien die sy tsamen met malcanderen gehadt hebben, so is Phao wt den lande na Sicilien ghereyst, daer hi langhe tijt bleef, dies Sappho bedruct en mistroostich hem sandt desen brief, om hem wederomme te crijgene naer sijn lant. Dese Sappho was inder Musijcken oock seer wel gheleert, als in alderhande snaerspel, dat sy alle maechden selue leerde, ende haer poeterije worde gheheeten Carmen lyricum, daer af datse nu noch behouwen den naem Sapphicum.