Declaratie van dese nauolghende Epistele.
PRotesilaus naer Troyen met alle de andere Griecxsche heeren seylende, is in Aulide een hauene in Boetien blyuen ligghen. Ende daer en hebbense niet connen wt gheraken, en dat so duer storm ende tempeest, en so duer contrarien wint. Dit hoorende Laodamia Protesilaus huysvrouwe, die hem vierich beminde, schrijft hem desen brief, hem radende, dat hy niet te stout sijn en soude in de oorloge, ende dat hy gedachtich soude sijn het gene datter gepropheteert was, als dat deerste die sinẽ voet op dlant van Troyen sette, die soude van Hector verslegen worden, dwelck Protesilao gesciede.