Declaratie van de derde Epistele.
DEmophoon de sone vã Theseus ende Phedra, duer grooten tempeest en onweer (comende van Troyen) is met sijn schepen in Tratien gearriueert, daer hy van Phillis Lycurgus dochter eerlijc ontfangen is: die vierich met sijnder liefden wert onsteken, en als hy langhe met minlijcke conuersatie daer by haer getriumpheert hadde, so moest hy om nootsakelijke redenen naer huys trecken, maer geloefde haer met vaster trouwen, dat hy binnen een maent wederkeeren souwe. Hi reysde naer huys, maer luttel was hy sorchuuldich om wederom te comene. Ende vier maenden gepasseert sijnde, schreef Phillis desen brief, hem vermanende dat hy gedachtich wesen soude sulcke weldaden als si hem bewesen hadde: oft, waert sake dat hy haer verlaten woude, soo was haer meyninge dat si haer seluen mistroostelijck dleuen benemen soude.