Het gheestelyck minne-voncksken der Godt-minnende zielen

[p. 7]

Ter eeren van de Boodtschap van Maria.

Stemme: Chere Philis vous sçavez mon martire.

DEn Enghel Gabriel van Godt ghesonden
Die heeft een Maeghdeken te Nasaret
Alleen in haer slaep-kamerken ghevonden,
Verslonden in het diepste van haer ghebedt.

2. Maria hiet dit Maeghdeken vol vrede,

Sy was ghegheven nu ten houwelijck,
Aen Joseph, die van Davids stam was mede,
Hoort den Enghel haer groeten seer vriendelijck.

3. Weest ghegroet, seyd' hy, Maeghdeken vol graci,

Den Heer die is met u tot alder tijdt,
Gheluckigh sijt ghy onder alle nati,
Boven alle vrouwen zijt ghebenedijdt.

4. Verbaest wierdt doen dit Maeghdeken ghepresen,

[p. 8]

 

Sy dacht hoe danigh is toch dese groet?

 

Vreest niet, seyd' Gabriel, voor't eeuwigh wesen,

 

By Godt vinde ghy grati', ô Maghet soet.

 

5. Siet in u lichaem sulde ghy ontfanghen,

 

Een' Sone sult ghy baren wonder schoon,

 

Noemt hem ghy JESUS, veel naer hem verlanghen,

 

Groot sal hy sijn boven in sijns Vaders troon.

 

6. Hy sal ghenaemt worden (wilt dit ghedencken)

 

Den Soon des alder-hooghsten, weest verblijdt,

 

David sijns Vaders stoel sal Godt hem schencken,

 

Regneren sal hy oock in der eeuwigheydt.

 

7. In't huys van Iacob over vele lieden,

 

Noyt en sal eyndighen sijn rijck als-dan,

 

Seyde Maria, hoe sal dit gheschieden?

 

Want seker ick en kende hier gheenen man.

 

8. Den heylighen Gheest sal over u dalen,

[p. 9]

 

Ende de kracht des alder-hooghsten Godt

 

Sal u om-lommeren en over-stralen,

 

Gheluck, ô Maria met dit heyligh lot.

 

9. Daerom die ghy sult baren met ghenuchten

 

Dien is heyligh, en ghenaemt voor-waer

 

Den Sone Godts, siet hoe dat naer veel suchten

 

Elisabeth u Nichte seer wonderbaer.

 

10. Ontfanghen heeft een' Soon in oude daghen,

 

't Is nu de seste maendt, en twijffelt niet,

 

Dat sy die hier onvruchtbaer heeft ghedraghen;

 

Gheen dingh is onmoghelijck by Godt siet.

 

11. Doen seyd' Maria, Enghel Godts vol eeren

 

My moet gheschieden hier naer al u woort,

 

Siet hier de Dienst-maeght van den Heer der Heeren;

 

Den Enghel trock weder met dit soet accort.

 

12. Ten Hemel al die Engheltjens verheughden,

[p. 10]

 

Hieten hem willekom met groot jolijt,

 

Doen wierdt den Sone Godts met grooter vreughden

 

Een' mensche in Maria, dit seker zijt.