Den Sendtbrief Pauli tot den Romeynen

op stichtsanghen gheset

Inhout van het X I I I. Capittel.

D'ouerheyt is van God, dus weestse ghehoorsaem,
Die haer wederstaet, wederstaet des Heeren woort:
Hebt malcander lief, veruult Godes wet bequaem,
Heyliget zijnen naem, en schout svleesch lusten voort.

Den seuenthienden stichtsanck, op de wijse van den 23. Psalm: Mijn God voedt my, &c.

1 EEn yegelijck sy onderdanich mede,
De Ouerheyt en macht in elcker stede,
Want daer en

[fol. C8r]

 

 

is hier geen macht dan van Gode,

 

Ende diet zijn die zijnt door Gods gebode,

 

2 Wie haer dan wederstaet met daet oft woorden,

 

Die is hier wederstaende Godes oorden.

 

 

 

[Bysonder] diese wederstaen seer dwalen,

 

Want doordeel Gods op hen seluen sy halen.

 

3 Voor d'Ouerheyt doruen hen niet verschricken

 

Die goet doen, maer die hen qualijck aen schicken:

 

Daerom en wilt ghy hier de macht niet vreesen,

 

Doet goet, ghy wert als dan van haer ghepresen.

 

 

 

4 VVant sy is Gods dienersse tot den goede,

 

Doet ghy het quaet, vreest en zijt op v hoede,

 

5 Want sy en sal tswaert niet vergeefs hier dragen,

 

Sy wreect en straft de ghene diet quaet waghen:

 

Sijt ghehoorsaem niet om de straf alleyne,

 

Maer oock om de conscientie reyne.

 

 

 

6 Hierom betaelt ghy schot in uwe iaren,

 

Want sy hanthauen dit als Gods dienaren.

 

7 Gheeft dan eenen yeghelijck hier gheduldich,

 

Schattinghe die ghy hier den schat zijt schuldich

 

Tol, en vreese gheeft na Christus leere,

 

Oock eerende die ghy schuldich zijt eere.

 

 

 

8 VVeest niemant sculdich, dan d'een d'ander lieuen

 

Want liefd' veruult de wet, sy can gherieuen,

[fol. C8v]

 

9 Touerspel laten, dootslaen daer beneuen,

 

Niet stelen oock, noch valsch ghetuyghe gheuen,

 

Oft yet begheeren, begrijpt dit van binnen,

 

V naesten wilt als v seluen beminnen:

 

 

 

10 Daer liefd' in is, dese gheen quaet doen sullen,

 

So is liefde dan hier des wets veruullen:

 

11 Wetende hoe den tijt nv is gheleghen,

 

Vanden slaep op te staen, tis tijt ghecreghen,

 

⁺Want salicheyt is nv naerder t'oorboren,

 

Dan doen wijt hier ghelooft hebben te voren.

 

 

 

12 Den nacht die is vergaen en wech genomen,

 

Ende den dach die is ons by ghecomen:

 

So laet ons nv der duysternissen wercken

 

Af legghen, ende om ons te verstercken,

 

Ons nv met wapenen des lichts becleeden,

 

Niet slachtende den godloosen en wreeden.

 

 

 

13 Laet ons eerlijck te wandelen hier passen,

 

Als inden dach, niet in dronck of in brassen,

 

Niet in slaepcameren of wulpsch bedrijuen,

 

Noch oock in nijdicheyt oft eenich kijuen,

 

Oft om tvleeschs lust hier te sorghen so seere,

 

14 Maer aen doen Jesum Christum onsen Heere.

+ Te weten, doen wy onder de verdoemenisse der Wet stonden.