Den Sendtbrief Pauli tot den Romeynen

op stichtsanghen gheset

Inhout van het V I. Capittel.

Die in God ghedoopt zijn, zijn gedoopt in zijn doot:
Die met hem gestoruen zijn, sullen met hem leuen:
Want die zijn ghewasschen, met zijnen bloede root,
Door den ghelooue, aen Iesum Christum verheuen.

[fol. B2v]

Den sesten stichtsanck op de wijse: Ick roep tot v Heer Iesu.

1 Wat sal van ons nv zijn geseyt,
Sullen wy in sond' blijuen
Op dat genade wert verbreyt,
Verd' wijck alsulck verstijuen,
Want die der sond' gestoruen zijn,
Hoe sullen wy ons gheuen,
Die t'aencleuen,
Ende [voor Gods aenschijn]
In de selfde noch leuen?

3 VVy zijn ghedoopt hier al te hoop
In Christi doot ['tzijn gauen]
Oock zijn wy met hem door den doop
In den doot dan begrauen.
4 So hy van der doot is verwect
Door tsvaders heerlijckhede,
Sal elck mede
In nieuwicheyt [perfect]
Wandelen [telcker stede.]

5 Also wy oock werden gheplant,
In een doot dierghelijcke,

[fol. B3r]

 

So sullen wy door zijn bystant

 

D'opstandingh' [in het rijcke]

 

6 Ghelijck zijn: en den mensche out

 

Cruycen in onsen gronde

 

Telcken stonde:

 

Op dat het lichaem stout,

 

Hier niet meer dient der sonde.

 

 

 

8 Ist dat wy zijn ghestoruen hier

 

Met Christo [waert om louen,]

 

So sullen wy door zijn bestier

 

Met hem leuen hier bouen.

 

9 Hy is op ghewect vander doot,

 

Hy en sal niet meer steruen:

 

Doot sal deruen

 

Haer heerschappie groot

 

Ouer hem te verweruen.

 

 

 

10 Der sonde sterf hy teenemael,

 

Dat hy leeft, leeft hy Gode:

 

Sterft oock de sond' int generael

 

11 Leeft Christo: [zijn ghebode]

 

12 En laet de sond' gheen ouerhant

 

Hebben inden lichame,

 

En bequame

 

In zijnen lust playsant

 

Hier te zijn ghehoorsame.

 

 

 

13 Tot sond' begheeft v leden niet

 

In tongherechtheyts wapen:

 

Begheeft v Gode, ende siet

 

Dat wt den dooden knapen

 

Ghy leuendich wort [door Christi bloet,]

 

Ende begheeft v leden,

 

Hier beneden,

 

Tot wapenen seer goet

 

Vol van gherechticheden.

 

 

 

14 Onder de wet zijt ghy niet meer,

[fol. B3v]

 

Maer onder de ghenade,

 

Dan sondicht daerom niet te seer,

 

15 En bruyckt ghehoorsaem dade:

 

Danct God dat ghy voor hebt gheweest

 

Sondich hier al ghemeyne,

 

Nv certeyne

 

Ghehoorsaem, die God vreest

 

Na de leer Christi reyne.

 

 

 

18 Ghemaect nv zijnde van sond' vry,

 

20 Sijn tsgherechticheyts knechten:

 

So ghy wel eer met moede bly

 

V leden cost op rechten

 

Tot het onreyn, twelck God verbiet.

 

21 Elck hem in dees ellende

 

Heylich wende,

 

Den dienst der sonden vliet,

 

Want de doot is haer ende.

 

 

 

22 Sijnde gheurijt niet en beducht,

 

Gherechtheyt sal v vueren

 

Tot heylichmakingh' is v vrucht,

 

V eynd' sal eewich dueren,

 

23 Want sonde heeft de doot voor loon:

 

Maer Gods gaef oueruloedich

 

Brenghet v spoedich

 

Tot den eewighen troon

 

Door Christi wonden bloedich.