Exordium magnum

vanden perickel der gheenre de hoer stemmen ghebruken totter menschen behaghelicheit

HEt sin sommige menschen al isset sake dat die heer hem gheuet oueruloedelike instrumenten sins loues dat sie nochtans den heren seer spaerlike daer van weder dienen. ende sin meer bereit mit den instrumenten te soeken glorie der menschen dan die glorie godes. alse se sparende hoer stemme versumen daghelix te singen die salmen ende die ymmen. op dat hoer stemme niet plomp en werde. mer wanner dat sie bequemheit des tydes vinden te glorieren in hem seluen ende in hoeren stemmen soe bewisen sie dat sie starck kunstich ende ghereet sin te singhen. ende boeren hoer stemme hoghe op. Die abbet van morimundo sechde datter een monick was in enen cloester der orden van cistercien die ene seer guede stemme hadde die hie niet ghebruken en wolde inden ghemenen arbeit godes dienstes mer mer soekende sine eyghene glorie sanck hoechlike niet anxtuoldelike noch ynnichlike sommige hoechtidelike responsen die hem beuoelen worden to singen om sunderlinge vordel sinre stemmen. Ende het is gheschiet in eenre hoechtyt des heren dat hie stont alse stom in al datter int ghemene ghesonghen waert vanden conuentum der bruederen. totten loue godes. ende dat vers van sinen respons seer lude sanck trillende

[p. 51]

ende bughende die stemme mit alsulker gheilicheit alse hie ghewoen was. Doe dat veers gheeyndet was op dat hie verstaen mochte van wien dat hie sin loen solde wachtende wesen van al sulken sanck. soe apenbaerde daer hyt ende die ander die by hem weren seghen. een cleyn duuelken lelick ende swart die sin onreine hande te gader slaende ende in wonderliker manieren schaterende wtriep seggende. O o wal. seer wal heuet hie ghesongen. daer is te male wal ghesongen. Die abbet van cistercien badt ene hillige ionfer dat se bidden solde dat hoer van gode gheapenbaert worde. wat in der orden van cistercien van versumenisse inghecroepen weer dat meest thegen weer der puerheit des waerachteliken gheesteliken leuens. nae dat sie verst ghenomen hadde ende totten heren ghebede ghestort hadde antwoerde sie aldus, heer ghy sult weten datter drie dinge sin in uwer orden die sonderlinge vertoernen die ogen der ouerster moeghentheit alse manichuoldinge der ackeren oueruloedicheit des tymmers. ende gheilicheit der stemmen