Exordium magnum

Een ander exempel vander twydracht

Een proeuest van enen nonnencloester verkalde op ene tyt mytten susteren van enen erue dat den cloester toe hoerde te vercoepen. Ende alset pleghet te gheschien dat een yeghelic sin voelen pleghet te beschermen alse dat beste. soe stont daer groete twist op thusschen den proeuest ende die susteren. Die proeuest sechde want hie een ouerste weer dat die sake solde gaen nae synen wille. die susteren arbeideden daer theghen ende ghengen van hem swaerlike gheschandalisiert. Inden seluen cloester was een leeck vrouwen persoen beseten mitten boesen gheeste. om welkes verloesinge die susteren daghelikes arbeideden int ghemeen mit hoeren ghebede. ende op dat sie den boesen gheest sterkeliker dwinghen mochten. soe deden se sie dickewile geen toe den hilligen sacramente. Des daghes daer nae die proeuest cleyn achtende dat die susteren schandalisiert weren alse hie verstuert was. ende die susteren noch swaerliker verstuert weren. soe ghinc hie tot godes altaer om me te offeren die vredesamyghe offerhande. nader consecracien soe dede hie voer hem brengen den besetenen menschen. Doe began die boese gheest in wonderliker manieren achter wt te stoten. ende wrede ende verueerlike stemme wt te gheuen ende den proeuest mit der alre bitterster scheldinge te berispen ende sechde. O alre onsalichste menschelken wat doestu du biste wtbarstende mit volre borsten dat dodelike venyn der toernicheit ende des twistens daer boeuen bistu schuldich voer den ogen der ouerster moghentheit dat die diernen des heren swaerlike gheschandalisiert sin. ende hier mede gaestu onschemeliken ende onwerdeliken toe konsacreren toe handelen ende toe eten dat vleisch des alre ouersten. Du haddeste wysliker ghedaen dattu huden niet ghegaen en haddeste in dat huus godes. dan dattu dine consciencie ghebrant hebste mit soe groter vermetelheit. Ende doe die boese gheest myt vele besweringe ende ghebede ghedwongen waert dat hie den godliken sacramenten

[p. 42]

eerwerdicheit bewisende wiken solde. alsoe lange dat dat wyf die hie quellede dat sacrament ontfanghen mochte. mit vele swaerheiden mochte hie nauwe bedwonghen werden dat hie verhengede dat sie dat sacrament ontfenge van den handen des gheens die onreyn was mytten ghebreke der twistinge ende des kyuens // Myt hoe groeter wysheit de twidrachticheit te schuwen is. ende hoe haesteliken datmen wedergaen sal totten bant des vreden ende der eendrachticheit. dat bewist ghenoech die groete iohannes die gheheten is aelmyssegheuer die om die groete myldicheit ende medeliden die hie hadde totten armen gheheten is mytten griexken woerde eleymon dat is barmhertich. Alse dese hillighe bisschop patriarche was vander groeter stad van alexandrien. doe wolde setten niceta patricius van der seluer stad eenrehande onrechte ewen op der market daer men kofte ende verkofte. welke ewen meer roeken na schattinghe ende ghiricheit dan nae rechtuerdigen ewen. Meer die milde patriarch anmerkende dat dit ghinck toe beswaeringe der armen de der riker weyde sin stont dit groetmoedeliken weder. ende soe ist gheuallen dat sie mit swaerre twistinge verstuert werden scheiden van een oneenmoedich. Die sachtmoedige hierde die gheleert hadde vanden ouersten hierde den heren ihsum xpisto sachtmoedich te wesen ende oetmoedich van herten. al mochte hie sine consciencie beschermet hebben mitten ghetuuch der beterre saken. ende cleyn gheachtet hebben des gheens schandalisieringhe die onredelike beweghen waert ontsteken mytten brant der ghyricheit. nochtans om den anxt godes doe die sonne haestede onder te gaen ontboet hie patricio by gheesteliken clercken een woert dat werdich is te ontholden in der ghehuechnisse segghende. heer patrici die sonne is by den onderganc. van desen woerde waert patricius berouwelike bewegen ende stont op mit haesticheit. he liep ende hielt die voete des eerliken patriarches. Ende aldus heuet die waerachtige naeuolger der sachtmoedicheit xpisti alse hie hem seluen ghebueghet heuet totter hoecheit der oetmoedicheit soe heuet hie in dat herte sins naesten wtghedaen die hoeuerdie ende twiste