Exordium magnum

van enen monick die kastiet waert om sine slapericheit

INden voerghenoemden cloester des groeten woldes was een gheestelic monick verciert myt vele ghenaden dese al wasset sake dat hie stedelike worstelde thegen die slapericheit arbeidende inden sanghe der salmen den here toe bewisen alset noet is enen reynen of pueren dienst. nochtans en mochte hie hier ynne niet verwynnen die krancheit der natueren. Op ene tyt doe hie stont inden choer in sinre ordinancie. ende alse slumerende scheen die salmen te singhen. soe stont by hem een eersaem persoen welkes aensichte hie niet en kande. ende dese persoen weckende den slumerende monick greep oen byden clede ander borsten. ende hie pinichde rechte of hie oen wt den choere trecken wolde. doe hie ghetoeghen waert oploeck hie sine oghen ende oen siende sechde hie. heer wie bistu ende waer trecstu my aldus. hie antwoerde. Ende waer om slapestu aldus. recht of hie segghen wolde. bistu al daer om opghestaen van dinen bedde. ende in dat choer ghegaen dat du slumerende ende mytten hoeuede knickende soldeste een lachen dynen vianden maken. ende niet meer daer om dattu blideliken soldeste dynen heren ende schepper psalme singen in die theghenwoerdicheit sinre hilliger engelen. Ende doe hie dat gheseghet hadde liet hie oen loes. ende te hantes verswan hie wt des broeders ogen. Meer die brueder die verdient hadde alsoe barmherteliken vanden heren ghekastiet te werden. om synre slapericheit wille sloech van hem seluen mitten anxte godes den slaep der traecheit ende der versumenysse. ende

[p. 31]

pinichde voert an voerhoediger ofte sorchuoldiger te wesen te waken ende die psalmen te singhen. Inden seluen cloester was een monic gheheten bernardus de starc scheen te wesen. want hie ionck was van iaren ende wal gheuoedet inden lichaem die nochtans tragher was dan die andere moniken. bewisende hem seluen traech tot dat werck der handen ende slaperich inder mettene. waer omme dat hie niet luttel swaer en was synen mede ghesellen. ende ouer al waert hie ghemerket vander traecheit. sunderlinge inder kerken daer hie versumender waert gheuonden. In eenre nachten doe hie sliep inder metten om sinre groter traecheit willen soe weckeden die voersanger hardeliker dan hi ghewoen was. hie waert beroert van herten ende stont op ende ghinc inden dormiter. Ende doe hie ghinc totter hemeliker camer soe was daer een schaer van duuelen die mit groten ghedalsche ende verueernyssen thegen hem riepen manichwerue. grypten grypten. Doe hie dat hoerde waert hie seer verueert ende liep haestelike weder inder kerken. Doe hie beuende ende hymende ghecomen was tot syn stoele. te hantes quam hie wt hem seluen ende viel neder ter eerden ende lach lange tyt sonder beweginge ende sonder synne recht alse doet. Die brueders nemen oen van daen ende droeghen in dat siechuus. doe hie wat weder tot hem seluen ghecoemen was vragheden hem die brueders wat hem gheschiet were. hie vertelde hem alte male wat hem gheschiet was. ende sechde dat hie pine gheleden hadde om sinre houerdien ende slapericheit wille. Een nouicius die inder seluer vren inden bedehuus was tughede dat hie ghehoert hadde dat selue ghedalsche ende roepen der duuelen. Aldus dan soe is die selue traghe ende versumende broeder salichliken castyet mitten perikel der godliker berispinge. ende heuet gheleert dat die traecheit slaperichheit ende andere dier ghelike ghebreke waerachtelike syn drecke ofte meesse. die die ossen dat sin die sterke manne inden anxt godes van hem werpen. dat is dat sie se veronwerdigen. mit welken drecke die onreyne duuelen. niet af en laten te steynen die traghe ende onnutte menschen tot hoerre groeter schaemten. Sie hoe groete onderscheit datter is thusschen die traecheit ende versumenysse die comet wt krancheit daer in den daghelixschen stryt die siele hoer seluen wasschende alse in den snee water pinicht den heren te bewysen enen puren reynen dienste. ende nochtans op dat sie oer niet en verheffe. soe weert sie ontreint mytter slapericheit. ende thusschen die onsalige onachtsamheit die afwerpet die gheesteliken wapen. ende leuert hoer seluen al willendes ouer den vianden. niet slumerende meer slapende ende snorkende onder tiden swaerliker inden chore dan inden bedde. ende mit gheenre leuenachticheit des herten wederstaende den boesen gheesten die sie bespotten ende segghen. bughe dy neder op dat wy voerby gaen moghen. Suuerlike is dat onderscheit bewesen mit desen tween exempelen die wy vertelt hebben. want den kempe xpisti daer wy eerste van sechden die daer stridende was ouermids der gracien mer verwonnen wert ouermids krancheit makede die guede engel sorchuoldigher tot sinre waernynghe mit enen sachten toe spreken. mer den anderen die onacht\sam

[p. 32]

was heuet die schare der boeser gheesten nae ghelopen mit verueernysse ende ropinge ende brachten oen by nae buten synne. laet ons exempel nemen vanden gueden verkiesende meer mytten manne der doechden te striden manlike inden gheesteliken stryt. ende laet ons hertelike alsoe medeliden hebben mytter laeuheit der tragher ende onnutter menschen. dat wy nochtans hoer versumenysse in alre manieren pinen te vlien om den hoepe des godliken wedergheuens. ofte om den anxt der hellen. Die oldeste brueders van clarendael pleghen te vertellen van den hillichsten vader bernardo dat doe hie op ene tyt des nachtes inder metten was sach hie den engel des heren mit enen wyroekes vate gheuullet myt hemelschen walrukenden krude omgaende beide die choeren. ende die hie vant wakende psalmen segghende ende bedende spisde hie hoer herten mit den alre suetsten dranck der gheesteliker kruden ende nam van hem dat verdriet. ende vermerrede in hem die ynnicheit. mer die hie sach dat slaperich traech ende onnutte weren ghinck hie voer by alse myt eenrehande onwerdicheit. ende en rekende sie niet werdich toe wesen der hemelscher gauen. Aldus kan die here troesten die oetmoedigen die in sinen dienste eernstich sin ende ynnich. hie kan oec verueren die traghen ende onachtsomighe menschen. die dat ghemack hoers vleisches mer soeken dan sie van rechte doen solden. Openbaerende in eenre manieren mit den theghenwoerdigen ordel dat die prophete baetschapte gheapenbaert te weerden in den toecomenden ordel alse wat onderscheit datter is thusschen den ghenen die den heren dient ende die hem niet en dient. thusschen den ghenen die den heren lofnisse doet ende betaelt ende den ghenen die lofnisse doet ende niet en betaelt. welken nae dat die hillige scrift tuget beter gheweest hadde niet te loeuen dan nader lofnisse niet te betalen