Archief voor kerkelijke en wereldsche geschiedenissen, inzonderheid van Utrecht. Deel 5

XXXVIII. Bevel van wegen Z.M. den Co., om de religieusen te apprehenderen, die hunne cloosters verlaten hebben. (1568).

Philips, byder gratie Gods, Coninck van Castilien, van Leon, etc. Onsen lieven ende getrouwen president ende luyden van onsen rade t'Uytrecht, onsen schout aldaer, ende allen anderen onsen schouten, amptmannen, bailluwen, drossaeten, proofsten, maerschallen ende allen anderen onsen officieren, wie ende van wat state ende conditie sy syn, mitsgaders die

[p. 369]

van onsen vasallen ende smaelle heren, hueren stedehouderen ende yeghelick van ulieden in 't besunder hierop versocht zynde, saluyt ende dilectie; van weghen heer Willem Franco, pater ende confesseur van Sinte Nicolaes binnen onser stede van Utrecht, ende minister generael vander derde ordene van Sinte Franciscus de penitentia, is ons verthoont geweest, hoe dat desen voerleden troublen tydt diversche religieusen onder syn obedientie behorende, duer seductie vande Geusen ende andere onduechdelike gheesten syn verleydt gheweest, sulcx datter eenighe hun habyt, ordre ende religie hebben verlaten, blyvende alnoch apposterende, sonder te willen wedercommen ter obedientien, ghelyck dit wel soude behoeren, ende hoewel die suppliant, alle zyne uyterste debvoir is doende ende heeft ghedaen, om hun weder opten rechten wech te brenghen, met allen heuschen vervolghe hem moghelyck wesende, en hebben nochtans daertoe nyet willen verstaen, maer syn latiterende in diversche plaetsen, tot groote schandalisatie der voorsz. ordene ende generael der ghemeen religie, sulcx dat hem suppliant nu van noode is, het uyterste remedie ende weerlicke handt te ghebruycken, diewelcke hem insghelicx by onse officiers wordt gheweyghert, zoo hy zecht, ons oitmoedelicken biddende, dat, om de verdoolde schaepen ter zalicheyt weder te brenghen, ons believen soude, hem te verleenen onse opene brieven van provisie, daer toe behoorende, soe ist, dat wy de zaken voorsz. overghemerct, u ontbieden ende bevelen seer expresselicken ende scerpelicken, dat ghy van stonden aen ende zonder vertrek off dissimulatie, ten verzoeke vanden voorsz. suppliant of syn ghecommitteerden, aentast ende apprehendeert oft doet aentasten ende apprehenderen metter daet alle geprofesside religieusen, 't sy mannen ofte vrouwen, der voorsz. derde ordene van Sinte Franciscus de penitentia, apostaten, ende die hun cloester ende professie, zonder voorgaende dispensatie daerop verworven te hebben inden hove van Romen, verlaten hebben, die de voorsz. suppliant u noemen ende aenbrenghen sal, ende op wat plaetsen ghy die selt moghen becomen, 't zy gheestelicke ofte waerlicke, ende die zelve apostaten, alzo ghevangen zynde, levert pede ligato in handen vanden voorsz. suppliant ofte zynen ghecommitteerden, tot zynen redeliken coste, om voorts hem te beweghen tot beteringhe ende ten weghen van zalicheyt, achtervolghende onsen edicten ende placaeten; ende des en wilt in ghenen ghebreke zyn, op de peynen, daerinne verclaert, want ons also ghelieft. Gegeven in onse stede van Bruessele, den 25. dach der maent van Junio, in 't jaer ons Heren duysent vyfhondert ende ende acht ende sestich, van onsen rycke van Spaengien, Sicil. 't 8^e, ende van Napels 't 10^e. Onder stont geschreven: By den Coeninck in zyn raede. Ondert.: De Langhe.

Collatie ghedaen jeghens zyn originael geschreven in francyne etc. By my, M. Benschup. 1568.

(Naar het oorspr. instrument.)