XXVII. Roerende die visitateurs van de verboden boecken. (1555).
Byden Keyser.
Weerdighe liewe beminde. Wy hebben achtervolgende onse leste brieven van placcate ghemaect ende uytgheroepen op d'extirpatie vande quaden secten, dwalingen ende ketteryen in onsen landen ende heerlicheden, onder anderen doen expedieren onse brieven van commissie op uluiden ende elken van u, omme te visiteren ende examineren in onsen landen van Hollant, Zeelant, Vrieslant, stat, steden ende landen van Utrecht, alle de boucken ende privilegien (!), die men aldaer sal willen printen, brenghen ende vercoopen, alsoe ghy by denselven brieven sien sult, die wy hiermede senden, u versoekende ende nyet te min ordinerende, dat ghy u reguleert naer inhout, ende soe verre in 't selve doende, ryst, oft dat ghy bevindt enighe difficulteyt notabile, sult deselve scriftelike overseynden, onsen seer lieven ende getrouwen, de president ende luyden van onsen secreten rade, omme voorts te ordineren, alst behooren sall.
Weerdige lieve etc., Godt sy met u.
Gescreven tot Brussel, den 22. dach van Sept., vyf ende vyftich.
Ondert.: de Zoete.
Onderschreven: Concordeert met synen originelen, teste me,
Ondert.: Anthonis Wolff, nts.
Opschr.: Den weerdighen, etc. Mr. Franchoys Zon, can. inde cathedrale kercke vd. Dom tot Utrecht, broeder Bern Grouwel, docteuren inde godheyt ende andere gecommitt. totter visitatien vd. boecken ende prentingen over onsen lande v. Holl., Zeel., Vriesl. ende Utrecht, etc.
(Uit het tweede Memoriaal van den Hove, fol. 376).
Auteursrechtvrij