't Kleyn Hoorns-liet-boeck, inhoudende eenige psalmen Davids, lof-sanghen, en geestelijcke liedekens

[Hoort vriendekens ghepresen]

Na de wijse: Daer ick gister avondt quam, daer scheen de Maen soo klaer.

HOort vriendekens ghepresen,
Ick schenck u een nieu liedt,
Ghy die daer zijt ghenesen
Van dat eeuwigh verdriet,
Leeft doch in sonden niet,
Want sy worden begraven
In de doodt Christi siet,
door doopsel, alst gheschiedt,
Soo ons Paulus bediedt.
2 Ghelijck als hem sijn Vader
Heeft vander doodt verweckt,
Soo moeten wy allegader
Verrijsen oock correckt,
Soo de Apostel spreckt,
In een nieuw leven wandelen,
Het vleesch aen 'tkruys ghestreckt
Een yeghelijck hem breckt
Van 'tquaedt dat in hem steckt.
3 Laet ons strijden als kloecken

[p. 222]

 

Tot allen tijden snel,

 

De mondt Godts heeft ghesproken,

 

dat des menschen opstel

 

Sijns hertsen, vatet wel,

 

Boos is, van sijn jonckheydt op,

 

Och vrienden, hoe rebel

 

Is ons natuers ghequel,

 

Och siet op Godts bevel.

 

4 Daer moeten wy na leven

 

Elck neme hem selven waer,

 

Wy die ons hebben begheven

 

Te volghen Christum naer,

 

Hy was sijnen Hemelschen Vaer

 

Gehoorsaem, tot der doodt des kruys,

 

dat blijckt in 't openbaer

 

dus laet ons allegaer,

 

Sien op de Schrift eenpaer.

 

5 Sy en sal ons niet bedriegen,

 

daer is wel op te staen,

 

Ons eyghen vernuft magh lieghen,

 

Wy en hebben soo vele niet aen

 

Wt ons selven, wilt dit verstaen,

 

Als yet wat goedts te dencken,

 

Na Paulus vermaen,

 

de Gheest Godts moet ons raen,

 

Oft wy missen de baen.

 

6 Dus laet ons wel useren

 

de Schrift op dit termijn,

 

Ende niet disputeren,

[p. 223]

 

Maer Godts navolghers zijn,

 

Als lieve kinderen fijn,

 

Weest oprecht in der liefden,

 

Doorsoeckt dat herte dijn,

 

Daer ghelt gheen schoonen schijn,

 

Alst binnen is fenijn.

 

7 Godt die heeft ons geroepen

 

In vreden algemeyn,

 

Eenen kamp te loopen,

 

door ghehoorsaemheydt pleyn,

 

Siet doch op Christum reyn,

 

desen Herder wilt na volgen,

 

Sijn stemme hoort alleyn,

 

Sijn schaepkens kennen geyn

 

Vreemde stemmen certeyn.

 

8 Sijn schaepkens uytverkoren,

 

die hebben sulcken aert,

 

Sijn stem altijdt te hooren

 

Hoort wat de Schrift verklaert,

 

Godt heeft een volck vergaert,

 

dat moet zijn inde werelt een licht,

 

daer toe heeft hyse gebaert,

 

Souden die dan eenpaert

 

Lichtveerdigh zijn, wat waert?

 

9 Oorlof mijn lieve vrunden,

 

Ick groet u, waer ghy zijt,

 

Laet ons doch de sonden

 

Schouwen, met grooter vlijt,

 

Of de Heere quam subijt,

[p. 224]

 

Blijft in de vryheydt staende,

 

Daer u mede heeft bevrijt

 

Christus ghebenedijt,

 

Sijn stemme hoort altijdt.