't Kleyn Hoorns-liet-boeck, inhoudende eenige psalmen Davids, lof-sanghen, en geestelijcke liedekens

Den xcj. Psalm.

DIe in Godes bewaring' sterck,
Begheeft hem onbesweken,
Die woont in een vast bollewerck,
Dies hy seer wel mach spreken,

En segghen by hem t'aller stondt:

Godt is mijn hulpe krachtigh,
Mijn borght end' oock mijn vaste gront,
Daer ick op hoop eendrachtigh.
2 Van des Iaghers valstricken al,
En van 'tghewelt seer machtigh
Van schadelijcke pesten sal

[p. 55]

 

Hy u oock helpen crachtigh.

 

Hy sal met den vleughelen zijn

 

V decken en bevrijden.

 

Sijn hulp sal u in noodt end' pijn,

 

Een schilt zijn t'allen tijden.

 

3 S'nachts sult ghy dat dingh' vreesen niet,

 

Dat de Menschen doet beven,

 

Noch de pijlen die s'daechs met vliet,

 

Gheschoten zijn daer neven.

 

Oock voor gheen sterven scherp noch groot

 

Dat 't volck des nachts bespringhet,

 

Noch voor 'thaestighe, 'twelck den doodt

 

Den Menschen 'sdaeghs toebringhet.

 

4 Al storven aen u slincker sijd'

 

Duysent, en thien duyst t'same

 

Ter rechter, noch zijt ghy bevrijt

 

Voor schaden onbequame.

 

Ghy sult onbevreest schouwen aen

 

De boos' in haer verderven,

 

End' hoe sy haren loon seer saen

 

Ontfanghen en be-erven.

 

Pause.

 

5 Om dat ghy tot Godt spreeckt eenpaer?

 

Ghy behoet my, o Heere,

 

En op Godt in alle ghevaer

 

Hoopt, en hem doet dees eere.

 

Met gheen schaden werdt ghy beswaert,

 

Noch gheen plaghen met allen,

 

En sullen u huys wel vermaert,

[p. 56]

 

Gheensins dat overvallen.

 

6 Hy gheeft den Enghelen bevel,

 

Zijnde tot u gheneghen,

 

Dats' op u steedts acht hebben wel

 

In allen uwen weghen.

 

Sy sullen in handen, dits claer,

 

V draghen fijn besloten,

 

Dat ghy niet vallen sult daer naer,

 

Noch u aen den steen stooten.

 

7 Ionghe Leeuwen en Slangen wreet,

 

Leeuwen en Draecken mede,

 

Sult ghy al sonder schaed' oft leet,

 

Onder den voeten treden.

 

Want dit spreeckt Godt van u voorwaer,

 

Om dat hy my vereeret,

 

Ick sal hem helpen uyt noodt swaer,

 

Want mijn Naem hy vermeeret.

 

8 Roept hy my aen, hy werdt verhoort,

 

In den noodt sal ick wesen,

 

By hem t'aller tijdt van nu voort,

 

Hy werdt van my ghepresen:

 

Ick sal hem vervullen seer goedt

 

Met veel vrolijcke daghen,

 

End' hem oock laten smaken soet,

 

Mijn hulp naer mijn behaghen.