't Kleyn Hoorns-liet-boeck, inhoudende eenige psalmen Davids, lof-sanghen, en geestelijcke liedekens

Den lxij. Psalm.

Op de wijse van den 24. Psalm.

HOe seer dat mijn ziel is ghequelt,
In Godt werdt sy gherust ghestelt,
Want hy is mijn toevlucht alleene,
Mijn troost, mijn bystant in der noot,
Mijn kracht die my voor den val groot,
My wel bewaert en anders gheene.
2 Hoe langhe sult ghy alle staen,
Om te schaden en doodt te slaen?
Ghy wert noch met schanden versteecken,
Als een wandt, die daer valt sult ghy,
En als een oude muer daer by,
Van selfs vergaen, scheuren en breken.
3 Sy en ghedencken anders niet,
Dan om t'onderdrucken met vliet,
Hem dien ghy wilt verheffen Heere:
Leughen behaeght hen met der daedt,
Haer woordt is soet, maer 't herte quaedt,

[p. 37]

 

Is vol vloeckens en vol oneere.

 

4 Maer ghy, mijn ziel, wilt doch voortaen,

 

Met ghedult op den Heere staen,

 

Op hem staet mijn hoop end' betrouwen,

 

Hy is mijn troost, en niemant el,

 

Mijn Heylant die my bewaert wel,

 

Gheen schand' noch leet kan my benouwen.

 

Pause.

 

5 Godt is mijn eer, mijn heyl, mijn kracht,

 

Mijn toevlucht, mijn sterckte, mijn macht,

 

Ghy volckeren wilt hem betrouwen.

 

Comt en stortet doch allegaer,

 

Voor Godt uwe herten eerbaer,

 

Op hem alleen willen wy bouwen.

 

6 Maer de Menschen machtigh en rijck,

 

Zijn ydelheyt alle ghelijck,

 

Yeder van hen te feylen pleghet,

 

Weecht ydelheyt en oock met dien,

 

De menschen al, soo sult ghy sien,

 

Dat ydelheyt veel swaerder weghet.

 

7 Op onrecht u doch niet verlaet,

 

Op gewelt noch stelen niet staet,

 

Wilt aen ydel dinghen niet hanghen:

 

Comt u 't goedt toe met overvloedt,

 

Wilt daer med' u hert en gemoet,

 

Gheensins laten wesen bevanghen.

 

8 De Heer spreeckt dickwils in sijn woort,

 

Alsoo ick dat hebbe ghehoort,

 

Dat hy alleyne zy almachtigh:

[p. 38]

 

Ghy zijt, Heer, vol ghenaden soet,

 

Die den Mensche wat recht is doet,

 

Nae zijn verdienst, door u handt krachtigh.