't Kleyn Hoorns-liet-boeck, inhoudende eenige psalmen Davids, lof-sanghen, en geestelijcke liedekens

Den xxxvj. Psalm.

Op de wijse vanden 68. Psalm.

DEs boosdoenders wille seer quaedt,
Ghetuyght sekerlijck met der daet,

[p. 21]

 

Dat hij niet vreest den Heere:

 

Want hy hem in't boose behaeght,

 

'Twelck hy noch hatet noch beklaecht,

 

Maer spot den vrome seere:

 

Seer schad'lijck is de leere fijn,

 

Vol van leugen ende fenijn,

 

En hy laet hem niet leeren,

 

Des nachts denckt hy niet dan schalckheydt,

 

Hy wil blijven inder boosheydt,

 

End' van geen quaedt hem keeren.

 

2 Heer u goetheydt en u woort waer,

 

Tot der lucht en den Hemel klaer,

 

Hen strecken na ons wenschen.

 

V oordeel vast als een bergh staet,

 

V recht diep als een afgront gaet,

 

Ghy behoet Vee end' Menschen.

 

Hoe groot is u goetheyt eenpaer,

 

Hen die onder u vleugelen haer

 

Te begheven ghedincken.

 

Haer begeert vervult ghy met goet,

 

End' aen uwer wellusten vloet

 

Voert ghy die datse drincken.

 

3 In u is des levens fonteyn,

 

End' u klaerheyt gheeft ons alleyn

 

Licht end' verstant om mercken:

 

Over de herten onbevleckt,

 

V goedigheyt, O heere, streckt,

 

Die steets schijnt in u wercken.

 

Dat my de voet des menschen wreet,

[p. 22]

 

Niet en vertreed', end' my gheen leet

 

End' doe, noch slae mits desen.

 

Hoe de boose vergaen, doch siet

 

Sy blijven in eewigh verdriet,

 

Sonder verlost te wesen.