't Kleyn Hoorns-liet-boeck, inhoudende eenige psalmen Davids, lof-sanghen, en geestelijcke liedekens

[p. 16]

Den xxiij. Psalm.

MYn God voedt my als mijn Herder ghepresen,
Dies sal ick ghenes dinghs behoeflijck wesen,
In 't groene gras seer lieflijck hy my weydet,
En aen dat soet water hy my gheleydet,
Hy verquickt mijn ziel, die seer is versleghen,
Om zijns naems wil leyt hy my in zijn wegen.
2 Al waert schoon dat ic in't dal des doots ginge,
End' dat my des doots schaduwe omvinge:
Ick vreesde niet, ghy zijt by my gestadigh,
En ghy troost my met uwen staf genadigh,
Ghy maeckt rijck met goeden seer velerhanden,
Mijn tafel voor d'ooghen mijner vyanden.
3 Ghy salft mijn hooft met rieckend' oly goedich,
En schenckt my den Beker vol overvloedigh,
Ghy sult doen dat uwe gunst, o Heer krachtigh,
Mijn leven langh by my steedts blijft eendrachtig
So dat ick hoop eeuwighlijck vast te woonen,
In Godes Huys, 'twelck niet is om verschoonen.