Eduard de Dene. Testament rhetoricael

⁺⁺ Augustinus de Ciuitate dei libro 4^o
Capi /16.

Voortyds merckende dedele Romeynen eendrachtich
dat alle quaet voortbrocht wierd huut ledichede
veel goden dies / die zy meenden warachtich
den mensschen stierende tot besicheyt machtich
ende werckene crachtich
die hebben zy ontfanghen Binder Roomsscher stede
En tot die zelfste goden / naer huerlieder zede
als goden tot tghemeene oorboort ghekeert
hemlieden templen ghesticht / in constegher snede
ende met alder neersticheyt daer gheEert

Maer de goddinne van Rusten die van besicheyt vliedt
die wilden zy gheenssins ontfanghen niet
Certeynlick binnen huerlieder stede / Maer
buten der stede / zoo eist gheschiet
Augustinus bediet
wierd huer eennen tempel ghesticht aldaer
gheen goden wilden zy hebben binnen voorwaer
die de mensschen mochten tot Ruste trecken
noch oock eeneghe andre claer openbaer
diese tot Ledicheyt / mochte verwecken

Ghemerct dies dan de Romeynen int leuen
gheen ledeghe wilden hebben inbleuen
Binnen huerlieder stede Te meer stercker hy
god almachtich die ons heeft gratien ghegheuen
zal de ledighe doen verworpen onvry
ouerdynct dit alle Ledighe leyaerts ghy
yeghelick wie hij zy
zal huutghaen tzynen wercke leecken en clercken
duer dauid den Psalmiste dit leeren wy⁺
Dat de menssche / es gheboren^* om wercken

+ 381 r

+ Fol. 381 r, r. 33 onderstreept.

+ Psal Ciij

* ‘gheboren’: ‘o’ over andere letter.