Eduard de Dene. Testament rhetoricael

Nydeghe quaetheyt

Nero wesende Roomsch keyser int leuen
heeft zonderlynghe vier quaetheden bedreuen
Eerst Roome / met viere ghedaen ontsteken
zeuen daeghen en nachten zoo barnende bleuen
huut causen / zoo dhistoryescryfuers spreken
dat hem by dien / zou kennesse zyn ghebleken
⁺⁺ hoe groot dat tvier was onder der zonnen
van als troyen barnde / doe zynde ghewonnen

Daer naer vulbrynghende tweetste quaet
dat hy tmeeste deel der senatueren Raedt
dede dooden binnen der Roomsscher stede
tderde zyn eeghin broedere / Als moordaet
heeft hem vermoort / Ieghens nathuerlicke zede
Tvierde / dat hy zyn eeghin moeder dooden dede
vp dat hy wreedzinnich der toe gheneghen
De plaetse zoude zien / daer hy hadde gheleghen /

+ 380 v

+ Fol. 380 v, r. 11-13 (woorden in humanistisch schrift) onderstreept.