Eduard de Dene. Testament rhetoricael

Lof

Lof heere god almachtich die eeuwich leeft
daer hemel / eerde / ende helle voor Beeft
⁺ diet al voedsel gheeft
hu dancken wy / huwer weldaeden groot
alder zonden vergheuer / die hier zondich sneeft
die thandschrift / dwelck Ieghens ons was / huutwreeft
Tserpent satanitich dies tonderdreeft
end hoe dats spyt heeft
zyt mildelic^* verleenende ons daghelicx brood
huut huwer Liefden schoot /
// die hu AnRoupen staetse by ter nood
die in hu hopen / worden niet beschaemt ghebleuen
ghenaedich heere iesu christe / duer huwe dood
ende wonden Roodt
zyn wy erboren / ende hebber by beseuen
een nieuwe Leuen
dies zy hu glorie alleene ghegheuen
ieghens tzondich sneuen // Maect my de stercke
zo en zal ick ieghens gheen heyrCracht beuen
ghij myn hulper en vulbrynghen / Tallen goeden wercke
Ic ghelooue in die helighe Christene kercke
Loochenende alle gruwel der Afgoderie
pompeuse houeerdie
der euangelyssche waerheyts partie
vliedende huuten Babylonschen percke
te ierusalem kiesende my Poorterie
verlaetende Alle heydensche Ceremonie
metten gheschuerde duuster tempels gordynen
Iesus christus gheboren vander maghet Marie
als eeuvvich^** Licht heeft ons commen beschynen
In onse zonden te dienene wildhij hem Pynen
en voor alle de zonden / des weerelts ghestoruen
Tvyandich zaet heeft hy zyn cracht doen verdwynen
ende wy verbannen inde eerdsche termynen
metten ouerspeelsterghe Concubynen
iesus christus metten zynen
heeft onslieden / den hemelsschen paeys verworuen /

+ 130 v

* ‘daghelicx’ doorgehaald; ‘mildelic’ interlineair toegevoegd.

** ‘t’ doorgehaald.