Eduard de Dene. Testament rhetoricael

Eerste Liedeken vanden
helighen sacramente

[p. 154]

Vpden Voys verIubileert hu nv ghy venus Ionghen
Inne desen Lustelicken Tydt /

Louet ghy hemelen / nv god den heere
Louet hem alle zyn inghelen zaen
Louet hem mensschen / oock dancbarich zeere
vvant hy hu bermherticheyt heeft ghedaen

Christus ghenaedich bermhertich goederthiere
huut grooter Liefden tonswaert duerstraelt
als broodt des leuens / tonser blyder chiere
huuten hooghen hemel / es hy ghedaelt

Eer hy vertrack tzynen hemelschen vadre
onslieden hy een ghedynckenesse schanck
als tleuen der weerelt / en voor ons allegadre
zyn vleesch voor spyse / zyn bloedt voor dranck

Voor onslieden teender offerhande
hem zeluen hy ouerghegheuen heeft
zyn vleesch en bloedt / Laet hy ons te pande
Twelck hy ons In tsacrament gheel gheeft

Zo vvie dat nutten zal zonder sneuen^+*
alsoot die heere wil laeten gheschien
die zal ghewinnen dat eeuwich Leuen
ende hy / en zal de doodt niet zien

Onse voorvaders hebben manna gheEten
twelcke was maer een figuerlick schyn
hoe ouervloedich hemlieden twas ghemeten
Al te zamen zy ghestoruen zyn /

⁺ Maer zo wie nutten zal Christus lichaeme
zynde waerachtich int Sacrament
zoo hy hyngh / an tcruce Tonser vraeme
het eeuwich leuen blyft in hem gheprent

Lof zy dan thooghe misterie schoone
daer christus Rust in vleesch ende bloedt
verleent ons gratie / god in persoone
voor wien hemelsch eerdsch helsche bughen moet /

+ ...

* Onleesbaar woord (‘sneuen’?) in andere (zeer zwarte) inkt.

+ 75 v