Conclusie, tot een cort vermaen, op al t'veur-seyde.
BEminde Leser, uyt oorsaecke vanden goeden, waerachtighen, ende Christelijcken Waerseggher, hebben wy al-hier vande loghenachtighe waersegghers ghesproken, ende van alle de sulcke, die metten boosen gheest om-gaen. Bewijsende, dat sy seer quaelijck doen, die sulcke te rade gaen, om van henlieden iet te weten, oft erghens in gheholpen te worden. Want Godt werdt daer mede seer vertorent, midts dat-men, soo doende, den boosen vyandt toe-draeght ende van hem versoeckt, t'ghene dat Gode alleen toe te schrijuen is. Ende want de boose gheest een liegher ende bedriegher is, ende onser sielen benijder, soo en doet hy ons nemmermeer deughdt oft veur-deel: ende als hy ons schijnt te helpen, dat en doet hy anders niet, dan met wille ende meyninghe, van noch meer in andere dinghen, ende alder-meest in de siele, te beschadighen.
Daerom hebben wy de goede ende goddelijcke remedien aen-ghewesen, veur de ghene die'ts waerachtelijck noodt meynen te hebben. Waerschouwende eenen ieghelijcken, van alle ongheorloofde versoeckinghen, deur wien dat oock soude moghen gheschieden: met hoe schoonen pretext oft schijnsel van goede dinghen dat wesen moght: ende ten derden, met hoedanighe versekertheydt van effecte dat-men soude moghen toe-segghen. Alle suspecte middelen van superstitie veur quaedt te schouwen, ende alleenlijck hem houdende aen t'ghene dat de heylighe Kercke veur goedt houdt, ende onberispelijck laet ghebruycken, als daer toe van haer eyghentlijck gheordineert, oft emmers vande selue gheapprobeert ende toe-ghelaten.
Vermanende binnen middelen tijde, die inden noodt zijn, tot patientie, ende wel-ghetrooste verduldigheydt, ist saecke dat soo-danighe gheorloofde middelen niet en helpen. Veur seker wetende, datt beter is, met Godt ende goede conscientie hier te lijden, met sekere ende vaste hope, van daer veur hiernae-maels met hem eeuwelijck te verblijden: dan hier teghen Godts woordt, wille, ende wet, deur s'vyandts toe-doen gheholpen te werden, ende sijn arme siele daer mede ter eeuwigher verdoemenisse te brenghen.
Daer-om, houdt dese instructie veur een vermaen, ende se-
Auteursrechtvrij