Cap. XIII.
Alder-besten raedt, als toouerije ende sulcke aen-stooten regneren.
TEn anderen is allen Christenen ende gheloouighen menschen veur eenen uytersten ende alder-besten raedt (die nemmermeer iemandt bedrieghen en sal) te raeden veur alle dinghen, ende in allen ghevalle, te sorghen veur een suyuer ende goede conscientie. Ende daer mede niet vervaert wesen, noch gheen vreese te hebben van den boosen vyandt, van alle sijn swarte ende boose consten, van alle tooueraers oft toouererssen des weerelts. Want alle die de minste macht niet en hebben om eenighen mensche oft beeste eenigh hinder aen te doen, dan deur besonder toe-laten ende ghedooghen van Godt al-maghtigh, alsoo alle schrifturen leeren. Het welcke Godt nemmermeer en ghedooght oft laet gheschieden ouer de sijne, dan om haer-lieder groot profijt, wel-varen, ende meerder saligheydt.
Hy en verlaet oock nemmermeer de ghene, die met een vast ghelooue, ende suyuer conscientie, op hem betrouwen, hem ghetrouwelijck dienende, ende by blijuende in d'onder-houden van sijne gheboden. Ende al ist saecke, dat hy de sulcke niet altijdts tijdelijck van alle sieckten, quellinghen des vyandts, oft ander swaerigheydt en bevrijdt, oft en verlost: nochtans is hy met hen-lieden in die tribulatie,Ga naar margenoot+ ende hen-lieden en can van al-sulck quaedt gheen quaedt gheschieden. Ende soo leert hy ons metter daedt, dat-men hem dienen moet, niet meest veur eenighen tijdelijcken loon, als lichaemelijcke ghesondtheydt, veur-spoedt ende gheluck in aerdtsche saecken, oft derghelijcke; maer om den eeuwighen loon van het toe-comende leuen te vercrijghen.
Dat de sulcke dan peysen by haer seluen, op de woorden vanden H. Prophete Isaias, die claerlijck seght ende prekt teghen alle tooueraers, waersegghers, ende sulcke duyuelrijen. En vreest henlieden niet (seyt hy) noch en zijtter niet af vervaert. Heylight alleenlijck den Heere der heir-crachten (te weten, deur het onder-houden sijnder gheboden) vreest hem, ende zijt met rechte van hem vervaert. Te weten, als ghy-lieden teghen hem mis-doet. Hy ist alleen, die ons waerachtelijck hinderen can, als wy't verdienen: die ons helpen ende bewaren can als wy op hem rusten ende betrouwen, teghen
Auteursrechtvrij