Veur-reden tot den Leser.
DEVR oorsaecke, beminde Leser, dat den tijtel ons boecks (die vvy den Christelycken VVaerseggher noemen) ende den naem van VVaerseggher, in onse ghemeyne sprake, niet ten alder-besten en luydt, ende als eenen vveder-slagh maeckt in de ooren van goede ende godvruchtighe Christenen, om de vville van die goddeloose ende boose generatie van volck, die haer seluen ten onghelijcke VVaersegghers noemen, ende diemen oock ghemeynelijck soo heet, als met een maniere van spreken, eenighe saecke met contrarien naem noemende, als niet min vvesende, dan sulcks als den naem uyt-gheeft, by de Latinisten met eenen Grieckschen vvoorde Antiphrasis gheheten: uyt sulcker oorsaecke (seggh'ick) soo ist, dat ick hier uvver L. teghen sulcken quaden in-val hebbe vvillen vvapenen, ende bevveren, op dat ghy v by auonture niet en stoot oft quetst aen den veur-noemden tijtel ons boecks: maer dat ghy den seluen met meerder gherustheydt ende verlusten uvves gheests, ende profijt uvver sielen, moght handelen, ende lesen.
Te meer heeft het my noodsakelijck ghedocht, dus dese VVaerschouvvinghe, als een seker Schild-vvacht uyt te stellen, op dat niet alleen onsen vvaerachtighen ende Christelijcken VVaerseggher den Leser de vvaerheydt ende saligheydt ter handt soude doen; maer op datter oock iet zijn soude, vvaer mede men teghen de loghenachtighe ende ongoddelijcke vvaersegghers moght beschermt ende bevrijdt vvesen.
Veur-nemelijckst, om dat dien schadelijcken ende verdoemelijcken handel des duyuels, soo seer nu in alle manieren aen-ghedreuen vverdt, ende van soo menigh verdoolt mensche veur goedt ende gheraedsaem versocht ende te vvercke ghestelt.
Om dese redenen dan, soo sal ick hier sonderlinghe dese puncten, d'een naer d'ander, veur-houden ende verclaren.
Auteursrechtvrij