Cap. V.
Profijt en goeden orboor van dese Rolle der Devghdsaemheydt.
OM dese schadelijcke ende eerloose versoeckinghe van alsulcke Fortuynen, auonturen, gheboorten ende ghevallen, met een beter uyt te sluyten, oft emmers (diet lusten sal) wat beters ter handt te nemen, ende soodanighe ijdelheydt, superstitie, ende onstichtelijcke tijdt-cortinghe te laten varen: Soo hebb'ick aldus op d'eynde mijns boecks, des Christelycken Waersegghers een ander vermaeck, ende beter oeffeninge by-gevoeght: deur de welcke men alle eerbaerheydt, deughdsaemheydt ende Godvruchtigheydt, oock met ghenoeghten leeren magh.
Niet, om deur het soecken, vinden, en lesen (van sulcks als met het draeyen van't nae-volghende rolleken iemanden aenghewesen sal worden) eenighe veur-ledene, teghenwoordighe, oft toecomende verholentheydt, gheluck, oft ongheluck, oft iet des-ghelijcks dat hem oft anderen aen-gaet, te kennen te gheuen, oft uyt sulcks hem iet op te segghen: in gheender manieren: maer alleenlijck, om uyt oorsaeck van sulck soecken, vinden ende lesen, eenigh goedt beweghen te crijghen, ende gheroert te worden, om in het beleuen sijns naems ende roeps, als Christen, noch meer aen te nemen, ende volcomer naevolgher Christi te worden: ghelijck-men van sulcks, ende tot sulcks, oorsaeck van deughden uyt alle dinghen nemen can ende magh, diemen siet, hoort, peyst, doet, oft lijdt.
Alsoo ist gheorlooft ende seer te prijsen, dat iemandt in een sermoon t'hemwaerts neme, als hy hem daer mede sonderlinghe ter deughdt beweeght vindt, ende ghevoelt, als oft hem van Godts-weghe toecomenGa naar margenoot+ ware. Aldus dede Sinte Franciscus, als hy uit het heyligh Euangelie hoorde: Nolite possidere aurum neque argentum, neque pecuniam in zonis vestris: non peram in via, neque duastunicas, neque calceamenta, &c. En wilt gheen goudt oft siluer besitten, oft gheldt in uwe bursen hebben, oft een male ouer wegh draghen: noch twee rocken hebben, oft schoenen aen uwe voeten. Soo nam hy dat veur sijnen Regel, als van Godt hem daer vercondight. Soo lesen wy oock van S. Antonius: Hoe hy ter kercken in-comende ende hoorendeGa naar margenoot+ uyt het Euangelie dese woorden: Si vis perfectus esse; vade & vende omnia quae habes, & da pauperibus: Wilt ghy volmaeckt wesen, gaet ende vercoopt al dat ghy hebt, ende gheeft het den armen, ende volght my naer: als oft hem eyghentlijck aen-gheseyt hadde
Auteursrechtvrij