Op den Christelijcken Waerseggher.
WAer in de Saligheydt des menschen is gheleghen;
Dat is een svvarigheydt, die alle VVijse vveghen.
Die heeft-men oyt ghevraeght, ghesocht in allen hoecken:
Elcks schole dit ghevvaeght, dit riepen alle boecken.
Maer noyt en hebben sy, met al hun spitse sinnen,
Den grondt van dit punct vrij, te recht connen vervvinnen.
Maer ghy, ô Leser goedt, hoe slecht, hoe iongh van iaeren,
VVilt ghy met cloecken moedt, vvijser dan al die vvaeren,
Den rechten sin verstaen, en saligheydt vervveruen,
Dat ghy met Godt moght gaen, vvanneer ghy comt te steruen?
Ten is v gheenen noodt, der Philosophen droomen,
Oft boeck van bloede roodt, t'onder-soecken met schroomen.
VVegh, vvegh, van hier, als roock, waer-seggers, hand-besienders,
Gheboorte-lesers oock, als duyuels plicht-bedienders.
Vry-moedigh neemt ter handt, en leest desen VVaerseggher,
Hier vindt ghy VVaerheyds standt, en valscheyds weder-leggher.
Leeft, siet, daer't v best greyt, hy sal v claer vermellen,
VVaer in dat saligheydt, en vvel-standt is te stellen.
Niet in des vveerelts pracht, hoogheydt, prijs, edel stammen,
Rijckdom, vvellust, oft maght, des men Godt siet vergrammen:
Maer in d'op-recht Gheloof, ghebruyck der Sacramenten,
End' in der Deughden schoof, met Godt in t'hert te prenten.
Mids VVeerelts cloeck vermaen, deur een godvruchtigh leuen,
Denckend' op s'Doodts bestaen, om Godt sijn siel te gheuen.
Leest dan met vlijtigheydt, en leert de rechte vveghen,
VVaer in de Saligheydt des menschen is gheleghen.
I.D.C.
| |
Initivm Sapientiae Timor Domini. 1.
Liber Sapientiae.
Initivm Sapièntiae Timor Domini.
Quod sibi principium posuit Sapientia vera?
Numinis, infixum summisso in corde, Timorem.
Welck is d'oprecht beghin: om tot Wysheyt te comen?
De Vreese Godts; met sin: Sonder dies te beromen.
Diuine Sagesse, Donne moy addresse, Pour aller a vous?
Commenc' a refraindre, Ton coeur, et a craindre, De Dieu le courroux.
|
|
Auteursrechtvrij