De Psalmen Davids, ende ander lofsanghen

Psalm CXXXII.

§1

GHEDENCKT doch des Dauids O Heer,
End oock aen al sijn lyden swaer:
Die v eedt

[p. *]

 

ded' in't openbaer,

 

End v' Godt Iacobs vol van eer,

 

Beloften altydt ded' eerbaer.

§2

Heer die beloefd' ick v (sprack hy)
Ick en wil in myn huys niet staen,
Noch op myn bedde slaepen gaen,
Iae oock niet eenmael sluymen vry,
Ick sal myn ooghen niet toeslaen.

§3

Tot dat ick Godt een plaetse reyn,
Vinde die voor hem sij bequaem,
Daer die Heer onse Godt eersaem,
Wonen end blyuen magh alleyn,
End des stercken Godts hooghe naem.

§4

Wy verstaen end ons wert vertelt,
Dat hem Ephrata t'schoone dal,
Behaeght bouen die plaetsen al,
Wy hebben gheuonden in't veldt,
Een oort t'welck voor v wesen sal.

§5

Daer sullen wy sijnde verblydt,
Hem besoecken, end t'aller stondt,

[p. *]

 

Hem bidden wt des herten grondt:

 

Dies maeckt v op Heer nu ter tyt,

 

Ghy end d'Arcke van v' verbondt.

§6

Laett die priesters daer bekleydt sijn
Met die waere gherechticheit:
Vwe heylghen met vroylickheit,
Vervult, end bewaert t'rycke fyn,
Vws ghesalfden voor teghenheit.
***

§7

Godt heeft Dauid een eedt ghedaen,
Die blyft vast end onwackelbaer,
End sprack: Op uwen stoel seer klaer,
Sal een uwer kindren voort aen,
Regteren met voorspoet eenpaer.

§8

Is't dat v' kinderen myn Woort,
End myn leere bewaeren vry,
Die sy verstaen: so sullen sy,
Met haeren kinderen nu voort,
Eewigh regieren onghestoort.

§9

Godt heeft verkoren Zion schoon,
Hy heeft lust te wonen aldaer,
Dit's myn ruste spreeckt hy voorwaer,
Myne lust, end myns herten kroon,
Daer wil ick wonen voor end naer.

§10

Haer spys' ick steedts seghenen sal,

[p. *]

 

End den aermen gheuen haer broot,

 

Die priesters wil ick in den noot,

 

Met heyl kleyden, end ouer al,

 

Vervullen met blydtschap seer groot.

§11

Dauid sal daer bloeyen met spoet,
Verheuen wert sijn hoorn met kracht:
Ick hebb' hem te weghe ghebracht,
Een lampe die steedts lichten moet,
Tot allen tyden dagh end nacht.

§12

Ick wil met schand' end smaedicheit
Syn haeters bekleyden ghemeyn,
Hen tot schand' end' oneer' met eyn,
Sal ick doen dat in heerlickheit
Dauids kroone bloeyen sal reyn.