De Psalmen Davids, ende ander lofsanghen

(2010)–Petrus Datheen– rechtenstatus



Psalm CI.
Dauid, eer hy noch met vredcen gheherschet heeft, beloeft Godt, dat hy dat ampt eenes godtsaelighen Heeren doen wil, t'welcke is oprechtelick leuen, die boose scherpelick straffen, ende die vrome eeren ende verheffen.
§1 VAN Gods goetheit end oordeel wil ick singen. Ick wil hem schoone lofpsalmen toebringhen, Daermet dat ick Godt den Heer bouen al,
[pagina *]
Groot maeken sal.
§2 Ick wil wandlen met oprechten ghemoede, Wan sal ick herschen met vred' in voorspoede? Dan wil ick myn volck trauwelick voorstaen, End vooren gaen.
§3 Van der boosheit heb' ick Heer' een afgrysen, End die anders met der daet niet bewysen, Dan ęrgheit, die sullen in dat huys myn Nemmermeer sijn.
§4 Oock die verkeerde menschen al te maele, Moeten wycken wt myn hof end myn saele. Hy sal van my die hem tot boosheit wendt, Niet sijn ghekent.
§5 Die met achterklap haeren naesten schaeden: Die met grootscheit end hooghmoet is belaeden, Die sal ick t'saemen wtroeyen met vliet, End lyden niet.
§6 Myn ooghen sullen sien nae den oprechten, Op dat sulcke moghen wesen myn knechten, My sullen dienen die vrom' ende goet, Sijn van ghemoedt.
§7 Die tot bedrogh end list hem wilt begeuen,
[pagina *]
Die sal van my in dienst niet sijn verheuen, Die lueghenspreker en sal oock by my Niet wesen vry.
§8 Vroegh met ernst sal ick dryuen wt den lande, Die boosen all', end t'saem bringen ter schande, Op dat Gods huys van boosheit groot end kleyn, Gantsch werde reyn.