Het oudt Huysken van Bethleem

met vele schoone leyssenen, lofsanghen ende andere geestelyke liedekens verciert, ter eere van den nieuwen gheboren Coninck onsen Salichmaker Christus Jesus

[Ons naket eenen soeten tijdt]

Op die wyse. Ick weet noch eenen Acker breet.

Ons naket eenen soeten tijdt
Wy moghen alle wel sijn verblijt
Met herten ende met sinnen
Ons is gheboren des seker sijt
So soete Ionghelinghe.

Ons is gheboren so cleynen Kindt

Van eender Maghet Ionghelinck
Een Sone is ons ghegheuen
Dat is ons allen een Salich dinck
Want hy is d’eewich leuen.

So schier als hy gheboren was

Wert hy gheleyt also ick las
In eender couder cribben
Want daer gheen ander Wieghe en was
Voor sijne teere ribben.

Die Beesten vielen op haer knien

Waer was dat wonder oyt meer ghesien
Sy bekenden haren Heere
Dat en sachmen noyt gheschien
Het is ons allen een groote leere

[p. 48]

 

Het wordt den Herderkens gheopenbaert

 

Als vanden Enghelen metter vaert

 

Die hen die bootschap brochten

 

Sy liepen al te Bethleem waert

 

Daer sijt Kindeken sochten.

 

Sy vonden alle die waerheyt

 

So hen die Enghelen hadden gheseyt

 

Vanden Kinde ende vande Moeder

 

Het is ons groote weerdicheyt

 

Dat hy is onse Broeder.

 

Die Herderen liepen altehant

 

Sy droeghen die mare heel door d’Landt

 

Dat Iesus was voorwaer gheboren

 

Waer ons dit Kindeken niet ghesant

 

Wy waren al verloren.

 

Daer na al op den achsten dach,

 

Als ons Lucas doet ghewach

 

So werdt dat Kindt besneden

 

Sijn suyuer bloet men storten sach

 

In sijne jonghen leden.

 

Iesus werdt dat Kindeken jonck

 

Gheheeten op die selue stondt

 

Dies wy ons allen verblijden,

 

Ende draghen in onser sielen gront

 

Hem eewelijck tallen tijden.

 

Dry Coninghen, quamen van so verre

 

Wt haren Lande op eender Sterre

 

Tot Bethleem inder Steden,

 

Sy offerden gout, wieroock ende myrre mede

 

Tot sijnder weerdicheden.

 

Doen Herodes dat vernam

 

Werdt hy toornich ende gram

 

Hy en cost hem niet bedwinghen

 

Hy dacht hoe hy dat ionghe lam

[p. 49]

 

Al totter doodt soude bringhen.

 

Herodes gheeboot den Ridders sijn

 

Om te dooden elck mannekijn

 

Die in dien Lande waren,

 

Sijn herte was in grooter pijn

 

Hy en woude niemandt sparen.

 

Ioseph terstont met haesten groot

 

Met den Kinde ende met der Moeder vloot

 

Doen hem die Enghel seyde

 

Vliet in Egypten om den noot

 

Al ouer die langhe Heyde.

 

Nv bidden wy dat Kindeken cleyn

 

Ende Maria die suyuer Maghet reyn

 

Dat zy ons willen beschermen

 

Ende by hun brenghen ons al ghemeyn

 

Ende verlossen van allen kermen.                         Amen.