Vijftigh lustighe historien oft nieuwigheden Joannis Boccatij

Michael Escalce teghen sommighe Jonghelinghen een wedspel gedaen hebbende, betoonde 't gheslachte der Baronchiers het edelste ter wereldt te wesen, ende wan daer mede een ghelach.

De negen-en-twintighste Historie.

Bedecktelijcke berispende, de ghene die gheen dinck groot en achten dan edelheydt van stamme.

TEn is noch niet langhe geleden dat binnen Florencen een jonck man was geheeten Michel Escalce, soo ghenoechlijcken ende vrolijcken man alsmen vinden mocht, vol nieuwicheden, daeromme hy oock vanden Florentijner jonghelingen seere bemint ende sonderlingen begheert was, als zy hem ghecrijgen mochten, tot hunluyder gheselschappe. Het gheviel op eenen tijt als hy met sommighe anderen was tot Montiguy, daer al coutende een vraghe onder hun voorts quam welcke d'edelste ende van't outste huys waren binnen Florencen. Daer op eenighe seyden het waren de Obertiers, d'andere spraecken het waeren de Lambertiers, dees noemde dese, die noemde andere na dat yeghelijck inden sinne quam. Escalse dit hoorende began te lachen ende seyde: wech wech sotten als ghy zijt, ghy en weet niet wat ghy seght: ick segghe u dat de Baronchiers de edelsten ende outste zijn, niet alleen van Florencen, maer oock mede van die inde gheheele werelt zyn: hierinne stemmen met my over een allen de Philosophen ende yegelijck diese kent, zoo ick doen. Ende op dat ghy d'een voor d'ander niet nemen en soud, zoo suldy weten dat ick spreecke vanden Baronchiers, die onse gebueren zyn, woonende by de groote lieve vrouwe. Als d'andere dit hoorden ende meynden dat hy daer mede wat anders, dan zy verstonden wilde segghen, begonsten zy altsamen zijnder te spotten ende seyden: hy spodt dan met ons, recht oft wy de Baronchiers niet zo wel en kenden als ghy lieden. Ick en doen waerlijck niet, sprack Escalse, maer segge u die waerheyt: ende is hier yemand die een weddinghe wil aengaen om een vry ghelach voor ses sulcke ghesellen als hy sal willen kiesen, ick ben bereyt om te wedden: daer en boven sal ick noch het oordeel hier af stellen aenden genen die ghy selfs daer toe sult nemen. Onder dit gheselschap was oock een ghenaemt Nere Vannini die daer op sprack, dat ghelt u alsulcken ghelach: ende over een ghecomen zijnde hierinne te ghelooven Peeter de Florentijn in wiens huys zy saten, zijn zy te samen tot hem ghegaen, de welcke naghevolcht waren van alle het ander gheselschap om Escalse dat te sien verliesen ende zijnder te bespotten, ende vertelden hem alle heur weddinghe.

Peeter dat een bescheyden jonck man was eerst ghehoort hebbende al dat Neri wilde segghen keerde hem tot Escalse, dien hy vraechde, hoe sult ghy mogen bewijsen t'ghene dat ghy seght: ick salt betooghen sprack Escalse, met zo goede redenen dat niet alleen ghy, maer oock

[p. T3r]

dese man diet loochent, bekennen sal de waercheyt te wesen. Ghy weet wel dat de menschen dies te edeler zijn hoe zy van ouder stamme zijn, ende alzo hieltmens oock nu terstondt onder dese lieden te wesen. Nu zijn ooc de Baronchiers de oudste van stamme boven alle menschen in deser stadt: zoo volchter ymmers uyt dat zy de edelste zijn. Bewijse ick dan dat zy de oudtste zijn, zoo hebbe ick sonder twijfele de weddinghe ghewonnen. Om dit oock te doen blijcken zoo suldy weten dat onsen Heere de Baronchiers maecte inden eersten tyden als hy noch eerst leerde schilderen: maer d'ander menschen zijn namaels gheschapen als hy wel schilderen conste. Wildy mercken of dit waer is, zoo slaet acht op de Baronchiers ende op andere menschen, dan suldy sien dat ander lieder aensichten wel ghedaen ende bequamelijck gheschickt zijn, maer de Baronchiers suldy sien deen met een lanck ende smal, dander met een onmatich breedt aensicht: dees heeft een seer langhe neuse, die een die seer cort is: sulcke heeft een lange kinne, die teghens de neuse opwaerts omme cromt, eenighe schijnen met heur caken Ezels te zijn, oock sijnder sommighe welcker een ooge veel grooter is dan't ander: men vinter die een ooghe veel hoogher dan de ander hebben, niet anders dan de aensichten zijn die de jonghers maken als zy eerst leeren conterfeyten oft namalen. Dus blijckt claerlijck genoech dat onse Heere alsoo ick gheseydt hebbe, dese Baronchiers maeckte als hy noch eerst leerde schilderen: sulcx datmen niet loochenen en mach oft zy en zijn de oudtste van alle andere, ende daerom oock nootlijck de edelste. Dit was nu seer wel gheweten van Peeter die de rechter was, ooc mede van Neri, die om 't bancket ghewedt hadde, ende van ghelijcken van alle d'ander gheselschappen in alle deelen vanden Baronchiers alzo te wesen: dies sy het lustich bewijs van Escalse ghehoort hebbende, al tsamen begonsten te lachen ende te segghen dat Escalse het meeste recht ende oock het bancket ghewonnen hadde: want de Baronchiers waeren voor seker de edelste, als oock de oudtste die niet alleen in Florencen, maer die oock inde gheheele werelt mochten zijn.