Schole der deughden

Cap. XI.

Vande leeringhe daer door Godt den mensche treckt tot Christum.

A.

NU soude ick gaeren hooren hoe Godt den mensche leert ende dit meer verclarender dan disputeerender wijse ghemerckt het al te lieflijcken saecke is dan om twistelijck ghehandelt te worden, soo is oock inde materie van 't hooren nu al soo veele bewesen dat elck (sluyte dan door partijdighe hartneckigheydt moetwilligh sijn ooghen) licht mach sien dat dit werck van't trecken Godes niet gheheel en gheschiet sonder des menschen wille ende medewercken. Ende want niemant kan ghelooven dat yemandt buyten of teghen sijn wille, ende sonder sijn eyghen werck van op-mercken, naedencken, erkauwen, over-weghen, onthouden, hanteren ende oeffenen eenighe dinghen mach leeren, soo moetmen oock nootelijck bekennen dat dit leeren Godes niet toe-gaet sonder wulcke menschelijcke wercken. Daerom sulcx te bewijsen nu nergens nae so noodigh en is, als het ordentlijck verclaren wat dit leren zy, wat Godt den mensche leert, hoedanigh de leer-jonge is, hoe Godt den mensch leert, hoe de jongher van Gode leert, tot wat eynde ende wat de vrucht zy van dit leeren ende anders 'tgunt ghy beter sult weten te segghen dan ick mach bedencken. Doch mooghdy hier ende daer wel uyter saken sluyten 'tgunt ghy in de school-sake voor hebt te bewijsen, Dit begheere ick vruntlijck van u ende sult my te min noch weyghern, door dien ghy siet wat goet vertrouwen ick op u vriendelijckheydt hebbe, de welcke daer inne blijckt dat ick u, wiens onderwijs ick in desen begheere een wet derf stellen, hoe ende in wat wijsen ghy my sult onderwijsen.

B.

U goedt betrouwen sal u dese mael niet bedrieghen, te min om dat ghy met redene begheert. Ick spreecke oock niet tot nut van my selve, maer van u, nu weet ghy beter wat in u is dan ick, ende verstaet dien oock beter dan ick, wat u nutste is, Dus wil ick u

[fol. 479v]

begheeren in desen gaerne nae comen om u op't meest my moghelijck is nut te zijn tot aen-waijsinghe van 't beste, 'twelck niet mach gheschieden soo ghy't niet van herten begheert ende soo de Waerheydts Gheest selve niet door my en spreeckt ende in u en werckt. De wijle ick u dan weet of merckelijcke waene begheerlijck te zijn totter waerheyts kennisse ende ick van my selve weete dat ick niet mijn, maer des Waerheyts eere soecke, soo gheloove ick vast dat wy vergadert zijn inden naeme Christi die soodanighen belooft in't midden van hen te zijn. Dit volbrenght nu o onbedrieghelijcke waerheyt Jesu Christi ende weest ghenadelijck met uwen waerheydts gheest tusschen ons t'onser verlcihtinghe, ist dat wy waerachtelijck in uwen name te samen zijn ghecomen, Amen.